Айни пайтда хизмат сафари билан Россияда бўлиб турган «Дарё» мухбири Муҳаммаджон Обидов Санкт-Петербург шаҳрида ўтказилган дўстлик фестивали ҳақида мақола юборган. Ушбу мақола эътиборингизга ҳавола этилади.
Ленинград вилоятида 110 дан ортиқ миллат ва элатлар истиқомат қилади. Улар ахил ва тотувликда умр кечирмоқда.
Ҳар бир халқ, элат ўз санъати, маданиятига эга. Вилоятда эса ҳар йили «Россия оҳанглари» шиори остида дўстлик фестиваллари ўтказиб келинмоқда. Бу галгиси Ладого кўли бўйидаги Приозерск шаҳрида бўлиб ўтди. Унда 50 га яқин миллий маданият марказлари, МДҲ делегациялари иштирок этди.
Фестивальда «ўзбеклар» чодирини тикиш ва безашда Санкт-Петербургда яшайдиган юртдошларимиз билан бирга Фарғона вилояти вакиллари иштирок этди.
Ўзбек халқи кийимлари, чолғу асбоблари, ҳунармандчилик намуналари, тасвирий санъат намуналари қўйилган чодир энг кўп тамошабин йиғди.
Дастлаб шаҳарнинг бош кўчаси бўйлаб иштирокчилар юриши уюштирилди. Бундай тамошани кўриш учун ўн минглаб Приозерск халқи йиғилган эди. Бош минбар олдидан ўзбеклар маданият маркази вакиллари ўтаётганда аҳоли бирлашиб ўзбек рақсларини ижро этди.
Ўзбеклар чодири ёнгинасида Наманган шаҳридан Санкт-Петербургга бориб ишлаётган Насимовлар оила аъзолари дошқозон осиб ош пиширди ва уни меҳмонларга улашди.
Ленинград вилоятида узоқ йиллардан буён муқим яшаётган яна бир санъаткорлар оиласи дор тикиб, унутилмас томошалар кўрсатди. Миллий маданият марказлари чодирлари билан танишаётган Ленинград вилояти губернатори Александр Дрозденко, Россия давлат Думаси депутатлари бизнинг кўргазма олдида узоқ қолиб кетди.
«Биз Ўзбекистоннинг Фарғона вилоятидан келдик», — дедим мен ва губернаторга заррин чопон, дўппи кийдириб иқтидорли фаргоналик рассом Отабек Шокиров қаламига мансуб тоғ ва дарёлар тасвири мўйқаламда чизилган манзарани вилоят ҳокими Шухрат Ғаниев номидан топширдик.
«Биз ҳамкасбим билан Санкт-Петербургда учрашиб икки вилоят иқтисодий ҳамкорлигини йўлга қўйиш борасида аниқ-равшан режалар тузганмиз ва уни амалга ошириш йўлида ишламоқдамиз. Фарғоналикларга қизғин саломларимни етказинг. Ленинград вилоятида хоҳ доимий, хоҳ вақтинча бўлсин яшаётган ўзбеклар меҳнатсевар, қонунга итоаткор ва маданиятли диаспорадир. Биз улар билан бир оиладек яшамоқдамиз» — деди Александр Дрозденко.
Фестиваль доирасида бўлиб ўтган мулоқотлар чоғи биз Ўзбекистонда турли миллат ва элатлар тинч-тотув яшаши, ўз халқининг маданиятини сақлаш, ривожланиши учун барча шароитлар яратилгани, Фарғонада ўтаётган миллий байрамлар ҳақида гапириб бердик.
Изоҳ (0)