Ayni paytda xizmat safari bilan Rossiyada bo‘lib turgan “Daryo” muxbiri Muhammadjon Obidov Sankt-Peterburg shahrida o‘tkazilgan do‘stlik festivali haqida maqola e’tiboringizga havola etiladi.
Leningrad viloyatida 110 dan ortiq millat va elatlar istiqomat qiladi. Ular axil va totuvlikda umr kechirmoqda.
Har bir xalq, elat o‘z san’ati, madaniyatiga ega. Viloyatda esa har yili “Rossiya ohanglari” shiori ostida do‘stlik festivallari o‘tkazib kelinmoqda. Bu galgisi Ladogo ko‘li bo‘yidagi Priozersk shahrida bo‘lib o‘tdi. Unda 50 ga yaqin milliy madaniyat markazlari, MDH delegatsiyalari ishtirok etdi.
Festivalda “o‘zbeklar” chodirini tikish va bezashda Sankt-Peterburgda yashaydigan yurtdoshlarimiz bilan birga Farg‘ona viloyati vakillari ishtirok etdi.
O‘zbek xalqi kiyimlari, cholg‘u asboblari, hunarmandchilik namunalari, tasviriy san’at namunalari qo‘yilgan chodir eng ko‘p tamoshabin yig‘di.
Dastlab shaharning bosh ko‘chasi bo‘ylab ishtirokchilar yurishi uyushtirildi. Bunday tamoshani ko‘rish uchun o‘n minglab Priozersk xalqi yig‘ilgan edi. Bosh minbar oldidan o‘zbeklar madaniyat markazi vakillari o‘tayotganda aholi birlashib o‘zbek raqslarini ijro etdi.
O‘zbeklar chodiri yonginasida Namangan shahridan Sankt-Peterburgga borib ishlayotgan Nasimovlar oila a’zolari doshqozon osib osh pishirdi va uni mehmonlarga ulashdi.
Leningrad viloyatida uzoq yillardan buyon muqim yashayotgan yana bir san’atkorlar oilasi dor tikib, unutilmas tomoshalar ko‘rsatdi. Milliy madaniyat markazlari chodirlari bilan tanishayotgan Leningrad viloyati gubernatori Aleksandr Drozdenko, Rossiya davlat Dumasi deputatlari bizning ko‘rgazma oldida uzoq qolib ketdi.
“Biz O‘zbekistonning Farg‘ona viloyatidan keldik”, — dedim men va gubernatorga zarrin chopon, do‘ppi kiydirib iqtidorli fargonalik rassom Otabek Shokirov qalamiga mansub tog‘ va daryolar tasviri mo‘yqalamda chizilgan manzarani viloyat hokimi Shuxrat G‘aniyev nomidan topshirdik.
“Biz hamkasbim bilan Sankt-Peterburgda uchrashib ikki viloyat iqtisodiy hamkorligini yo‘lga qo‘yish borasida aniq-ravshan rejalar tuzganmiz va uni amalga oshirish yo‘lida ishlamoqdamiz. Farg‘onaliklarga qizg‘in salomlarimni yetkazing. Leningrad viloyatida xoh doimiy, xoh vaqtincha bo‘lsin yashayotgan o‘zbeklar mehnatsevar, qonunga itoatkor va madaniyatli diasporadir. Biz ular bilan bir oiladek yashamoqdamiz” — dedi Aleksandr Drozdenko.
Festival doirasida bo‘lib o‘tgan muloqotlar chog‘i biz O‘zbekistonda turli millat va elatlar tinch-totuv yashashi, o‘z xalqining madaniyatini saqlash, rivojlanishi uchun barcha sharoitlar yaratilgani, Farg‘onada o‘tayotgan milliy bayramlar haqida gapirib berdik.
Izoh (0)