Жорий йил 20—22 сентябрь кунлари «Ёшлар ижод саройи»да «Таълим ва мутахассислик» XIX халқаро кўргазмаси бўлиб ўтади. Бу ҳақда «Дарё»га Ёшлар медиа маркази маълум қилди.
Кўргазма Ўзбекистон ёшлар иттифоқи, Савдо-саноат палатаси, Олий ва ўрта махсус касб-ҳунар таълими ҳамда Бандлик ва меҳнат муносабатлари вазирлиги ҳамкорлигида ташкил этилмоқда. Унда маҳаллий ва АҚШ, Хитой, Франция, Ҳиндистон, Япония, Германия, Латвия, Чехия, Англия, Малайзия,Венгрия, Испания, Россия, Канада, Швейцария, Сингапур каби давлатларнинг олий ўқув юртлари, уларнинг Ўзбекистондаги филиаллари, хорижда таълим олишга кўмаклашувчи ташкилотлар, нодавлат таълим муассасалари ҳамда ўқув курслари иштирок этиши кутилмоқда.
Шунингдек, кўргазма давомида рақобатбардош, талаб қилинаётган мутахассисликлар билан таништирувчи таълим дастурлари намойиш этилади, бандликка кўмаклашувчи марказлар, йирик компаниялар иштирокида «Бўш иш ўринлари меҳнат ярмаркаси» ўтказилади.
Кўргазмада Тошкент шаҳридаги касб-ҳунарга ўргатиш маркази ва хорижда ишлаш истагида бўлган ёшлар учун Ташқи меҳнат миграцияси масалалари агентлиги фаолияти билан танишиш имконияти яратилади. Ёшлар иттифоқи томонидан Олий ва ўрта махсус таълим вазирлиги билан ҳамкорликда ташкил этилган «Мен танлаган олийгоҳ» видеороликлар танловининг тақдирлаш маросими ҳам бўлиб ўтади.
Изоҳ (0)