Қашқадарёда жиянига қўлланган қамоққа олиш чорасини ўзгартириш учун 2 млн сўм беришга уринган шахс ушланди

Жорий йил 16 сентябрь куни Чироқчи тумани ИИБ ходими раҳбариятга мурожаат қилию, унга пора таклиф қилинаётганини билдирди. Бу ҳақда ИИВ жамоатчилик ва ОАВ билан алоқалар бошқармаси хабар берди.

Маълум бўлишича, 15 сентябрь куни Жиззах вилояти, Зарбдор туманида яшовчи Н.Т. ва Жиззах шаҳрида яшовчи Ю.К.га нисбатан қўзғатилган жиноят иши бўйича ўзини Н.Т.нинг тоғаси деб таништирган фуқаро К.Б. ходимнинг олдига келади. Уларга нисбатан қўлланилган қамоққа олиш тарзидаги чорани бошқа эҳтиёт чорасига ўзгартириш ҳамда жиноят ишини уларнинг фойдасига ижобий ҳал қилиб беришни сўрайди ва эвазига пора таклиф қилади.

Ушбу билдирги юзасидан шу куни вилоят ИИБ ва прокуратура ходимлари ҳамкорлигида ўтказилган тезкор тадбир давомида К.Б. ходимга хизмат хонасида 2 миллион сўмни пора сифатида бераётганида ашёвий далиллар билан қўлга олинди.

Ҳолат юзасидан жиноят иши қўзғатилган. Тергов ҳаракатлари олиб борилмоқда.