Norwegian Breakaway денгиз саёҳати кемасининг эгаси кема шифокорининг айби билан қўлидан ажралган собиқ ходимга уч миллион доллардан ортиқ товон пули тўлашига тўғри келади. Бу ҳақда Fox News хабар берди.
Сербиялик 30 ёшли Илия Лончар Norwegian Breakaway кемасида официант бўлиб ишлаган. Денгизда сузиш вақтида унинг кўнгли айниб, гриппни эслатувчи аломатлар пайдо бўлган. У шифокор Себастьян Кампузанога мурожаат қилган. Шифокор кемада атиги бир неча ойдан буён ишлаётган эди ва етарлича тажрибаси бўлмаган.
Кампузанонинг кўрсатмасига биноан, фелдшер официантнинг вена томирига аллергик касалликларни даволашда қўлланиладиган прометазин дорисини юборган. Лончар шу заҳотиёқ ўнг қўлида ачишишни ҳис қилган, у эса кучли оғриққа айланган, кейин қўл кўкарган ва қорайиб кетган. 20 соатдан кейин официант Флоридадаги Канаверал портига туширилган. Бир энча кундан кейин эса унинг қўли касалхонада кесиб ташланган.
Қўлни кесиб ташлаш дорининг катта дозаси мушак орасига эмас, балки вена томирига юборилгани сабабли зарур бўлган. Агар шифокор беморни дарҳол операция қилганида ёки уни вертолётда эвакуация қилганида, қўлни сараб қолиш мумкин эди. Бироқ шифокор на унисини, на бунисини қилган.
Америка арбитраж ассоциациясининг Баҳсларни ҳал қилиш халқаро маркази судьяси кемага эгалик қилувчи Norwegian Cruise Line компаниясини Лончарга 3,3 миллион доллар миқдоридаги зарарни тўлашга мажбур қилган.
Norwegian Breakaway 2014 йилда энг йирик денгиз саёҳати кемалари рейтингида олтинчи ўринни эгаллаган. Узунлиги 324 метр бўлган кема ўзига 3988 нафар йўловчини сиғдира олади.
Изоҳ (0)