2018 йил 11 сентябрь куни Ўзбекистон Республикаси Бандлик ва меҳнат муносабатлари вазири Шерзод Қудбиев Сеулда Корея Республикаси Кадрлар бошқаруви вазири Ким Пан Сок билан учрашди. Бу ҳақда вазирлик матбуот хизмати «Дарё»га хабар берди.
2018 йил 28 майда Ўзбекистон Республикаси Президентининг «Ўзбекистон Республикаси Бандлик ва меҳнат муносабатлари вазирлиги тасарруфидаги Ташқи меҳнат миграцияси агентлигининг хорижий ваколатхоналарини очиш тўғрисида»ги 3743-сонли қарори қабул қилинган бўлиб, қарорга кўра Корея Республикасининг Кванджу шаҳрида Ўзбекистон Ташқи меҳнат миграцияси агентлиги ваколатхонасини ташкил этиш масалалари кўриб чиқилган эди.
Шунга мувофиқ, 11 сентябрь куни вазир Шерзод Қудбиев бошчилигидаги Ўзбекистон делегацияси Корея Республикасига етиб борди. Дастлабки музокаралар Сеул шаҳрида Кадрлар бошқаруви вазири Ким Пан Сок билан бўлиб ўтди.
Учрашув давомида томонлар давлат хизматларини янада такомиллаштириш, давлат хизмати ходимлари малакасини ошириш ва бу борада ўзаро тажриба алмашиш каби долзарб масалаларни муҳокама қилди. Хусусан, вазир Ким Пан Сок Ўзбекистонда кадрлар бошқаруви тизимини такомиллаштириш ва «Давлат хизматлари тўғрисида»ги Қарорни ишлаб чиқишда ҳар томонлама ёрдам беришга, шунингдек, Корея Республикасида давлат хизматчиларини ўқитиш масалаларини кўриб чиқишга тайёрлигини алоҳида таъкидлади.
Ўз навбатида, Бандлик ва меҳнат муносабатлари вазири Шерзод Қудбиев кўрсатилган илиқ муносабат учун миннатдорчилик билдириб, келгусида кадрлар малакасини ошириш тизими ва давлат хизматлари соҳасида ўзаро ҳамкорлик алоқалари мустаҳкамланиб боришига умид боғлади.
Учрашув якунида томонлар давлат хизмати соҳасида ўзаро тажриба ва маълумот алмашиш, Ўзбекистон Республикаси Президенти Шавкат Мирзиёевнинг 2017 йил Корея Республикасига ташрифи якунида имзолаган ҳамкорлик тўғрисидаги Меморандумни амалга оширувчи «Йўл харитаси»ни ишлаб чиқишга келишиб олди.
Изоҳ (0)