Қирғизистон Республикасининг Чолпон-Ота шаҳрида Бутунжаҳон кўчманчи халқлар ўйинлари давом этмоқда.
Кеча, 5 сентябрь куни ўтказилган ўйинларнинг учинчи кунида қирғиз кураши бўйича баҳсларда ўзбекистонлик Миркомил Аҳадқулов (-60 кг) ва Аъзамжон Анваржонов (-96 кг) бронза медалини қўлга киритди, деб хабар беради Жисмоний тарбия ва спорт вазирлиги матбуот хизмати. Улоқ бўйича баҳсларда Ўзбекистон кўпкари бўйича миллий терма жамоаси 3 сентябрь куни ўтказилган Бошқирдистон Республикаси билан ўйинда 20:2 ҳисобида ғалаба қозонган бўлса, 5 сентябрда Франция терма жамоасини 19:6 ҳисоби маблуғ этиб ярим финал йўлланмасини қўлга киритди.
«B» гуруҳида ярим финал баҳслари бугун, 6 сентябрь куни Тошкент вақти билан 17:00 да Чўлпон-Ота шаҳридаги «Ипподром» аренасида ўтказилиб, унда Ўзбекистон миллий терма жамоаси Қозоғистон Республикаси терма жамоалари билан баҳсга киришади. Ғалаба қозонган жамоа «А» гуруҳидаги Қирғизистон ва Россия термалари ўртасидаги ўйинларда ғолиб чиққан жамоа билан финалда учрашади.
Эслатиб ўтамиз, 2 сентябрдан 8 сентябрга қадар давом этадиган мазкур мусобақада дунёнинг 66 давлатидан ташриф буюрган 1556 нафар спортчи медаллар учун баҳс олиб бормоқда. Ўзбекистон делегацияси 13 та спорт тури бўйича 58 нафар спортчи билан иштирок этмоқда.
Изоҳ (0)