Qirg‘iziston Respublikasining Cholpon-Ota shahrida Butunjahon ko‘chmanchi xalqlar o‘yinlari davom etmoqda.
Kecha, 5-sentabr kuni o‘tkazilgan o‘yinlarning uchinchi kunida qirg‘iz kurashi bo‘yicha bahslarda o‘zbekistonlik Mirkomil Ahadqulov (-60 kg) va A’zamjon Anvarjonov (-96 kg) bronza medalini qo‘lga kiritdi, deb xabar beradi Jismoniy tarbiya va sport vazirligi matbuot xizmati. Uloq bo‘yicha bahslarda O‘zbekiston ko‘pkari bo‘yicha milliy terma jamoasi 3-sentabr kuni o‘tkazilgan Boshqirdiston Respublikasi bilan o‘yinda 20:2 hisobida g‘alaba qozongan bo‘lsa, 5-sentabrda Fransiya terma jamoasini 19:6 hisobi mablug‘ etib yarim final yo‘llanmasini qo‘lga kiritdi.
“B” guruhida yarim final bahslari bugun, 6-sentabr kuni Toshkent vaqti bilan 17:00 da Cho‘lpon-Ota shahridagi “Ippodrom” arenasida o‘tkazilib, unda O‘zbekiston milliy terma jamoasi Qozog‘iston Respublikasi terma jamoalari bilan bahsga kirishadi. G‘alaba qozongan jamoa “A” guruhidagi Qirg‘iziston va Rossiya termalari o‘rtasidagi o‘yinlarda g‘olib chiqqan jamoa bilan finalda uchrashadi.
Eslatib o‘tamiz, 2-sentabrdan 8-sentabrga qadar davom etadigan mazkur musobaqada dunyoning 66 davlatidan tashrif buyurgan 1556 nafar sportchi medallar uchun bahs olib bormoqda. O‘zbekiston delegatsiyasi 13 ta sport turi bo‘yicha 58 nafar sportchi bilan ishtirok etmoqda.
Izoh (0)