Кеча, 5 август санасида Тошкентдаги «Универсал» спорт саройида бокс бўйича собиқ Европа ва Жаҳон чемпиони, профессионал боксда ўз вақтида WBC, WBA, IBF йўналишларида чемпионлик камарига эгалик қилган Константин Цзю иштирокида мастер-класс ташкил этилди, деб хабар беради МОҚ матбуот хизмати.
Тадбир Миллий олимпия қўмитаси ҳамда Ўзбекистон Республикаси Мактабгача таълим вазирлиги ҳамкорлигида ташкил этилди. Константин Цзю ёш боксчилар билан машғулотлар олиб борди. Тадбир давомида мухлислар Цзю билан суҳбатлашиб, суратга ҳам тушишди. Якунда собиқ боксчига эсдалик совғалари тақдим этилди. Миллий олимпия қўмитаси номидан махсус совғани Бош котиб Жасур Матчанов топширди.
«Ёшим элликка яқинлашиб қолди. Аммо, ҳар куни машғулот ўтказаман. Чунки ўзимга-ўзим ваъда берганман. Сизга ҳам маслаҳатим шу. Ўзингизга ваъда беринг ва буни амалга оширинг. Машғулотларни тўхтатманг. Ўз мақсадингиз сари интилишда давом этинг. Албатта орзуингизга эришасиз», – деди Цзю ўзбекистонлик ёш боксчиларга қарата.
Маълумотнома:
Тўлиқ исми: Константин Борисович Цзю
Фуқаролиги: Россия, Австралия
Туғилган санаси: 1969 йил, 19 сентябрь
Туғилган жойи: Серов, Свердловск области.
Яшаш жойи: Россия, Москва.
Профессионал боксда: 34та жанг (31та ғалаба, 2та мағлубият, 1та жанг амалга ошмаган)
Ҳаваскор боксда: 282та жанг (270та ғалаба, 12та мағлубият)
Жаҳон чемпионатида:
1989 йил, бронза (Москва)
1991 йил, олтин (Сидней)
Европа чемпионатида:
1989 йил, олтин (Афина)
1991 йил, олтин (Гётеборг).
Изоҳ (0)