«Ўзбекнефтгаз» Россиянинг «Зарубежнефть» компанияси билан Ўзбекистоннинг узоқ муддатли конларида углеводород хом ашёсини қазиб олиш ҳажмини янада ошириш имкониятларини ўрганишга киришди.
Ушбу мақсадда жорий йилнинг 27—30 август кунлари «Зарубежнефть» АЖнинг геология, геофизика ва конларни ривожлантириш бўйича бир гуруҳ мутахассислари Ўзбекистонда бўлди. Улар «Андижоннефть» АЖ мутахассислари билан биргаликда Хартум, Бўстон, Жанубий Оламишиқ, Наманган, Тергачи ва Шўрбулоқ конларида нефть қазиб олишни кўпайтириш имкониятларини ўрганиб чиқди.
Жумладан, қўшма гуруҳ жойларда таҳлил учун материалларни йиғиб олди.
Ўрганиш давомида турли технологиялар кўриб чиқилди, улар орасида электр марказдан қочирма насосларни тушириш ва қудуқларда таъмирлаш ишларининг самарадорлигини ошириш кабилар бор.
Ушбу ҳамкорлик «Ўзбекнефтгаз» АЖ ва «Зарубежнефть» АЖ ўртасида нефть ва газ соҳасида ҳамкорлик имкониятларини ўрганиш бўйича жорий йилнинг 30 июнь куни имзоланган англашув меморандумига мувофиқ амалга оширилмоқда. Ҳужжатга мувофиқ, томонлар қўшма гуруҳ ташкил этган ва икки компания мутахассислари иштирокида қўшма тадқиқот ишлари бошлаб юборилган.
Изоҳ (0)