Россия президенти Владимир Путин Минскда 2015 йилнинг 11 ва 12 февраль кунлари Ангела Меркель, Франсуа Олланд ва Пётр Порошенко билан бўлиб ўтган музокараларда Украина президентига украин қўшинларини янчиб ташлаш билан таҳдид қилган. Бу ҳақда Франция собиқ президенти Франсуа Олланд ўз мемуарларида ёзди, дея хабар бермоқда Forum Daily.
«Порошенко ва Путин нуқул бир-бирига овозларини баландлатар эди. Бир маҳал Россия президенти шунчалик асабийлашиб кетдики, рўпарасидаги кишининг қўшинларини узил-кесил янчиб ташлаш ҳақида таҳдид қила бошлади. Бу шуни фош қилардики, Украина шарқида Россия қўшинлари бўлган. Путин хатосини пайқаб қолиб, ўзини қўлга олди», — деб ёзади Олланд.
Шунингдек, у ўз мемуарларида Путин Украинанинг шарқий ҳудудлари мухториятини талаб қилган вақтда Порошенко Украина суверенитетини ҳимоя қилганини қайд этди. У айирмачилар бошлиқлари билан бевосита алоқасини рад этиб, улар билан маслаҳатлашиб олишни талаб қилган.
Олланд музокаралар кўп сонли норозиликлар билан жуда секин силжиганини эсга олди. У Россия президенти айирмачилар бошлиқлари билан маслаҳатлашиш учун четга чиққанини ҳам айтди. Бир неча дақиқадан кейин қайтиб келиб эса, ўзи эрталаб танимаслигини айтган айирмачилар рози эканлигини маълум қилган.
Бундан ташқари, Олланд ҳеч иккланмасдан 2014 йил июлида Донецк ҳудудида МH-17 самолёти қулашига россияпараст жангарилар учирган ракета бехосдан сабаб бўлганини таъкидлаган.
Изоҳ (0)