Rossiya prezidenti Vladimir Putin Minskda 2015-yilning 11 va 12-fevral kunlari Angela Merkel, Fransua Olland va Pyotr Poroshenko bilan bo‘lib o‘tgan muzokaralarda Ukraina prezidentiga ukrain qo‘shinlarini yanchib tashlash bilan tahdid qilgan. Bu haqda Fransiya sobiq prezidenti Fransua Olland o‘z memuarlarida yozdi, deya xabar bermoqda Forum Daily.
“Poroshenko va Putin nuqul bir-biriga ovozlarini balandlatar edi. Bir mahal Rossiya prezidenti shunchalik asabiylashib ketdiki, ro‘parasidagi kishining qo‘shinlarini uzil-kesil yanchib tashlash haqida tahdid qila boshladi. Bu shuni fosh qilardiki, Ukraina sharqida Rossiya qo‘shinlari bo‘lgan. Putin xatosini payqab qolib, o‘zini qo‘lga oldi”, — deb yozadi Olland.
Shuningdek, u o‘z memuarlarida Putin Ukrainaning sharqiy hududlari muxtoriyatini talab qilgan vaqtda Poroshenko Ukraina suverenitetini himoya qilganini qayd etdi. U ayirmachilar boshliqlari bilan bevosita aloqasini rad etib, ular bilan maslahatlashib olishni talab qilgan.
Olland muzokaralar ko‘p sonli noroziliklar bilan juda sekin siljiganini esga oldi. U Rossiya prezidenti ayirmachilar boshliqlari bilan maslahatlashish uchun chetga chiqqanini ham aytdi. Bir necha daqiqadan keyin qaytib kelib esa, o‘zi ertalab tanimasligini aytgan ayirmachilar rozi ekanligini ma’lum qilgan.
Bundan tashqari, Olland hech ikklanmasdan 2014-yil iyulida Donetsk hududida MH-17 samolyoti qulashiga rossiyaparast jangarilar uchirgan raketa bexosdan sabab bo‘lganini ta’kidlagan.
Izoh (0)