Бироз аввал Индонезиядаги Осиё ўйинларининг теннис баҳсларида биринчи рақамли сараланган спортчи сифатида қайд этилган ўзбекистонлик Денис Истомин финал баҳсида хитойлик Йибинг Вуни мағлуб этиб, чемпион бўлганлиги ҳақида хабар берилганди.
Денис бу ғалаба орқали 2020 йилда Япониянинг Токио шаҳрида бўлиб ўтадиган 32-ёзги Олимпиада ўйинларига тўғридан-тўғри йўлланмани қўлга киритди.
Қайд этиш жоиз, Истомин ўзбекистонлик спортчилар орасида биринчилардан бўлиб Токио—2020 Олимпиадасига йўлланмага эга чиқди. Мазкур ғалаба муносабати билан Миллий олимпия қўмитаси президенти Умид Аҳмаджонов мамлакатнинг биринчи рақамли теннисчисига табрик йўллади. Бу ҳақда қўмита матбуот хизмати хабар бермоқда.
Денис Истоминни Осиё ўйинларининг олтин медалини қўлга киритгани билан табриклаймиз. Бу Ўзбекистон учун Осиё ўйинларидаги қимматли медаль бўлди. У фаолияти давомидаги энг нуфузли мусобақалардан бирида ғолиб бўла олди. Денис бир неча йил давомида халқаро кортларда мамлакатимиз шарафини муносиб ҳимоя қилишга, ўзбек спортни нуфузини юксалтиришга хизмат қилди. Унинг Осиё ўйинлари олтин медалини қўлга киритганлиги юксак профессионал ҳислатларга эга эканлигидан дарак бериб турибди. Қитъа ўйинлари ғолиби сифатида Денис Истомин юртдошларимиз орасида биринчи бўлиб Токио—2020 Олимпия ўйинлари лицензиясига эга бўлгани ушбу ғалаба салмоғини янада оширди. Фурсатдан фойдаланиб, Ўзбекистоннинг биринчи ракеткасини ушбу муваффақият билан Ўзбекистон миллий олимпия қўмитаси, Олимпия ҳаракати иштирокчилари ва, албатта, ўзим номимдан чин кўнгилдан табриклайман. Шунингдек, Осиё ўйинлари давомида юртимиз шарафини муносиб ҳимоя қилиб, ватанимиз байроғини юқорига кўтарган Бекзод Абдураҳмонов, Никита Рафалович, Мўминжон Абдуллаев, Шаҳбоз Холмурзаев ва Шаҳбоз Абдужабборовларни чемпионлик билан муборакбод этаман. Шу билан биргаликда, ҳали стартга чиқмаган спортчиларимизга баҳсларда омад тилайман. Сизлардан умидимиз катта! Сизни ватанимизда яқинларингиз, халқимиз ва Президентимиз кутишмоқда.МОҚ президенти, Умид Аҳмаджонов
Изоҳ (0)