Тожикистон Республикаси президенти Эмомали Раҳмоннинг Ўзбекистон Республикасига Давлат ташрифи доирасида Тошкент шаҳрида Ўзбекистон—Тожикистон бизнес форуми ҳамда «Тожикистонда ишлаб чиқарилган» миллий маҳсулотлар кўргазмаси бўлиб ўтди. Бу ҳақда Ташқи ишлар вазирлиги матбуот хизмати «Дарё»га хабар берди.
2018 йил 16 август куни икки давлатнинг 400 дан ортиқ тадбиркорлари бизнес-форумда иштирок этдилар. Музокаралар якунига кўра умумий 133,2 млн доллар миқдорида 58 та шартнома ва келишувлар имзоланди. Улардан 52 таси – умумий 89,9 млн долларга тенг экспорт шартномалари, 3 таси – 3,3 млн доллар ҳажмида импорт шартномалари ва қолган 3 таси – молиявий ҳамкорлик бўйича келишувлар (40 млн доллар). Жумладан, нефть-газ, металлургия, машинасозлик, электротехника, кимё, қурилиш, фармацевтика, озиқ-овқат саноатлари, молия ва бошқа соҳаларга оид келишувлар имзоланган.
2018 йил 17 август куни икки давлат раҳбарлари Шавкат Мирзиёев ва Эмомали Раҳмон «Тожикистонда ишлаб чиқарилган» номли кўргазмага ташриф буюрдилар ва Тожикистоннинг турли соҳалардаги ишлаб чиқариш салоҳияти билан яқиндан танишиб чиқдилар.
Кўргазмада Тожикистон Республикасининг 100 дан ортиқ саноат корхоналари иштирок этди. Жумладан, «Талко Груп», «Фароз» компаниялари, «Колинхои Кайроккум», «Амири», «Маколли», «Гаюр цемент» ва «Моҳир цемент» МЧЖ, «Шири Душанбе», «Оби зулол» ЁАЖ, «Ангишт», «Намаки Ашт ва Хожмумин» ДУК ва металлургия, машинасозлик, кимё, тоғ-кон, озиқ-овқат, енгил саноат ва бошқа соҳалардаги йирик компаниялар ўз маҳсулотларини намойиш этдилар.
«Ушбу кўргазма маҳсулотларимизнинг юқори даражадаги сифатини бўлажак ҳамкорларимиз ва истеъмолчиларга намойиш этиш учун қулай имконият яратади. Ўзбекистон бозори биз учун жуда истиқболли ҳисобланади. Ўйлайманки, бизнинг маҳсулотлар ҳам Ўзбекистон бозорида ўз ўрнини топади, чунки сифат жиҳатидан биз бошқа хорижий брендлардан қолишмаймиз. Ташрифимиз давомида биз маҳаллий компания билан шартнома туздик ва яқин 2 ой ичида маҳсулотларимизнинг биринчи партиясини етказиб берамиз,» – дея таъкидлайди Акмал Ҳамидов, «Амири» қандолат маҳсулотлари фабрикаси директори.
Ушбу бизнес-форум ва кўргазмани ўтказишдан асосий мақсад – икки давлат тадбиркорлари ўртасида ўзаро фойдали ҳамкорликни йўлга қўйиш ва мустаҳкамлаш билан бирга Тожикистонда ишлаб чиқарилган маҳсулотларни Ўзбекистондаги аудиторияга намойиш этиш ҳисобланади. Шунингдек, бу тадбирлар иккитомонлама инвестициялар ҳажмини оширишга ҳамда Ўзбекистон ва Тожикистондаги тадбиркорларнинг қўшма корхоналар очилишига замин яратади.
Изоҳ (0)