Tojikiston Respublikasi prezidenti Emomali Rahmonning O‘zbekiston Respublikasiga Davlat tashrifi doirasida Toshkent shahrida O‘zbekiston—Tojikiston biznes forumi hamda “Tojikistonda ishlab chiqarilgan” milliy mahsulotlar ko‘rgazmasi bo‘lib o‘tdi. Bu haqda Tashqi ishlar vazirligi matbuot xizmati “Daryo”ga xabar berdi.
2018-yil 16-avgust kuni ikki davlatning 400 dan ortiq tadbirkorlari biznes-forumda ishtirok etdilar. Muzokaralar yakuniga ko‘ra umumiy 133,2 mln dollar miqdorida 58 ta shartnoma va kelishuvlar imzolandi. Ulardan 52 tasi – umumiy 89,9 mln dollarga teng eksport shartnomalari, 3 tasi – 3,3 mln dollar hajmida import shartnomalari va qolgan 3 tasi – moliyaviy hamkorlik bo‘yicha kelishuvlar (40 mln dollar). Jumladan, neft-gaz, metallurgiya, mashinasozlik, elektrotexnika, kimyo, qurilish, farmatsevtika, oziq-ovqat sanoatlari, moliya va boshqa sohalarga oid kelishuvlar imzolangan.
2018-yil 17-avgust kuni ikki davlat rahbarlari Shavkat Mirziyoyev va Emomali Rahmon “Tojikistonda ishlab chiqarilgan” nomli ko‘rgazmaga tashrif buyurdilar va Tojikistonning turli sohalardagi ishlab chiqarish salohiyati bilan yaqindan tanishib chiqdilar.
Ko‘rgazmada Tojikiston Respublikasining 100 dan ortiq sanoat korxonalari ishtirok etdi. Jumladan, “Talko Grup”, “Faroz” kompaniyalari, “Kolinxoi Kayrokkum”, “Amiri”, “Makolli”, “Gayur sement” va “Mohir sement” MChJ, “Shiri Dushanbe”, “Obi zulol” YoAJ, “Angisht”, “Namaki Asht va Xojmumin” DUK va metallurgiya, mashinasozlik, kimyo, tog‘-kon, oziq-ovqat, yengil sanoat va boshqa sohalardagi yirik kompaniyalar o‘z mahsulotlarini namoyish etdilar.
“Ushbu ko‘rgazma mahsulotlarimizning yuqori darajadagi sifatini bo‘lajak hamkorlarimiz va iste’molchilarga namoyish etish uchun qulay imkoniyat yaratadi. O‘zbekiston bozori biz uchun juda istiqbolli hisoblanadi. O‘ylaymanki, bizning mahsulotlar ham O‘zbekiston bozorida o‘z o‘rnini topadi, chunki sifat jihatidan biz boshqa xorijiy brendlardan qolishmaymiz. Tashrifimiz davomida biz mahalliy kompaniya bilan shartnoma tuzdik va yaqin 2 oy ichida mahsulotlarimizning birinchi partiyasini yetkazib beramiz,” – deya ta’kidlaydi Akmal Hamidov, “Amiri” qandolat mahsulotlari fabrikasi direktori.
Ushbu biznes-forum va ko‘rgazmani o‘tkazishdan asosiy maqsad – ikki davlat tadbirkorlari o‘rtasida o‘zaro foydali hamkorlikni yo‘lga qo‘yish va mustahkamlash bilan birga Tojikistonda ishlab chiqarilgan mahsulotlarni O‘zbekistondagi auditoriyaga namoyish etish hisoblanadi. Shuningdek, bu tadbirlar ikkitomonlama investitsiyalar hajmini oshirishga hamda O‘zbekiston va Tojikistondagi tadbirkorlarning qo‘shma korxonalar ochilishiga zamin yaratadi.
Izoh (0)