Ўзбекистондаги вазирлик, идора ва ташкилотлар матбуот котиблари фаолияти танқид қилинди

Ўзбекистон Миллий ахборот агентлиги мамлакатдаги вазирлик, идора ва ташкилотлар матбуот котиблари фаолиятини танқид қилувчи мақолани эълон қилди.

«Очиқ тан олиш керак, бугун Ўзбекистонда матбуот котиблари иши қониқарли эмас. Қайсики вазирлик, қўмита, идора ва ташкилот фаолияти оммавий ахборот воситаларида танқидга учраса, энг аввало, шу ташкилотнинг матбуот котиби бошида калтак синмоқда. Яъни, кутилмаган танқиднинг олдини ололмагани сабабли бош айбдорга чиқарилмоқда. Ҳатто айрим ҳолларда раҳбарларнинг ўз матбуот котибига «ёвқараши» ёки «масофа сақлаб муомалада бўлиши» тафаккур қобиғини узоқ йиллардан буён ўраб олган қўрқув пардаси ҳамон сўтилмаганини кўрсатади», — дейилади мақолада.

Бундай ҳолатларга «Жамият» газетаси томонидан «Ўзбекистон ҳаво йўллари» миллий авиакомпанияси матбуот хизматининг суст ва самарасиз иши кескин танқид остига олингач, хизмат раҳбарининг таҳририят ҳодимларига дўқ-пўписа ва босим ўтказгани, оқибатда унинг ишдан кетгани мисол қилиб кўрсатилди.

Таъкидланишича, аксарият матбуот котиблари ўриндошлик асосида икки ва ҳатто учта жойда ишлайди, бу асосий куч ва диққатни жамлашга тўсиқ бўляпти, табиийки, ташкилот матбуот хизмати ишига салбий таъсир ўтказяпти.

«Йирик ташкилотлар, тижорат банклари матбуот котибларининг иши сал бошқачароқ шаклланган. Уларга ижодий ходим деб эмас, балки ўзи "нон еб турган" муассаса ҳақида танқид чиқмаслигини кафолатловчи шахс сифатида қаралади. Бу ташкилотлар хайрихоҳ нашрларга йил бошидан реклама ёки бошқа тарғибот ишлари учун ажратадиган маблағларни гўё танқид ёмғиридан асровчи ўзига хос "соябон" деб билади… Яна бир очиқ манзара бор. Бугун адади кўп минг сонли марказий газеталарда чиқмаган танқид интернет нашрларида ёки ижтимоий тармоқларда эълон қилинмоқда. Шу сабабли вазирлар ва бошқа амалдорлар энди ўзи ва ташкилоти учун асосий «хавфли манзил»ни ижтимоий тармоқлар ва интернет, деб билмоқда. Қандай йўл тутмоқ керак? Раҳбарлар машҳур сайтларнинг етакчи журналистларига "совчи" қўйишаяпти – матбуот котиблигига ишга таклиф қилмоқда», — дейилади мақолада.

Шунингдек, айрим матбуот котиблари савияси талабга жавоб бермаслиги, улар икки қатор фикрни эплаб ёзолмаса, баъзилари журналистика кўчасига қадам ҳам қўймаганлиги таъкидланди.

Мақолада Журналистлар ижодий уюшмаси ёки ОАВни мониторинг қилиш маркази томонидан ташкил қилинадиган ва муҳим мезонларни қамраб олувчи «Матбуот хизматлари» ҳафталик рейтингини тузиш таклиф қилинди. Бу ғайрат билан, куйиб-ёниб ишлаётган матбуот котибларини рағбатлантириши умуман ишламаётган котибларни эса тетиклик ва ҳушёрликка ундаши, вазирларни керакли чоралар кўришга мажбур қилиши таъкидланди.