Фарғона вилоятининг Боғдод туманида Республика ишчи гуруҳи маҳаллаларда ва оилаларда ижтимоий-маънавий муҳитни ўрганиб, аниқланган муаммоларни бартараф этишга кўмаклашмоқда. Республика ишчи гуруҳи таркибига Президент девони, Бош прокуратура, Ички ишлар вазирлиги, Хотин-қизлар қўмитаси, Дин ишлари бўйича қўмита, Савдо-саноат палатаси, Ёшлар иттифоқи вакиллари ва журналистлар киритилган. Бу ҳақида «Дарё» мухбири Азизжон Эрматов хабар бермоқда.
Республика ишчи гуруҳи томонидан ўтказилган меҳнат ярмаркасида 854 нафар фуқаро доимий иш билан таъминланди.
3 кун давом этган меҳнат ярмаркасида 132 та корхона ва ташкилот 1228 та бўш иш ўрни билан қатнашди. Ярмаркада 343 нафар фуқарога ишга жойлашиш учун йўлланмалар берилди, 170 нафар фуқаро ҳақ тўланадиган жамоат ишларига жалб қилинди, 209 нафар хотин-қиз касбга қайта тайёрлаш учун саралаб олинди. «Ҳар бир оила — тадбиркор» Давлат дастури асосида 146 нафар фуқарога имтиёзли кредитлар ажратилди.
— «Ҳар бир оила — тадбиркор» дастури асосида банкдан имтиёзли кредит маблағи олишни мақсад қилгандим. Бу ниятим шу бугуннинг ўзида амалга ошди ва Халқ банкининг туман филиали томонидан ажратилган уч миллион сўм миқдоридаги кредит маблағи ҳисобига бир дона тикув машинасини сотиб олдим. Энди ўз хонадонимда бемалол чеварчиликни йўлга қўйишим мумкин, — дейди Озодахон Мирзакаримова.
Ярмарка якунида тадбиркорлик фаолиятини бошламоқчи бўлган 25 нафар фуқарога ҳамда касбга қайта ўқитиш ва малака ошириш учун ишсиз фуқароларни жалб қилган саккиз нафар тадбиркорга энг кам ойлик иш ҳақининг уч баравари миқдорида имтиёзли сертификатлар топширилди.
Изоҳ (0)