Швециянинг кўплаб шаҳарларида қора кийим ва ниқобдаги жиноятчилар автомобилларни оммавий равишда ёқиб юборди. 80 дан ортиқ машина тўлиқ ёниб кетган, яна 30—40 та автомобиль зарарланган. Бу ҳақда Meduza хабар берди.
https://twitter.com/RaphDeBrouwer/status/1029312155143864320
Энг кўп ёнғин Швециядаги катталиги бўйича иккинчи бўлган Гётеборг ва ундан 70 километр узоқликда жойлашган Троллхеттан шаҳрида амалга оширилган. Гётеборг шаҳрининг туманларидан бирида тахминан 60 та автомобиль ёқиб юборилган, уларнинг 31 тасини олов тўлалигича йўқ қилган. Троллхеттанда тахминан 30—40 нафар олов ёқувчи кўчаларни тўсиб қўйган ва полициячиларга тош отган.
Шунингдек, автомобиллар Швециянинг Люсекил, Алафорс, Фалкенберг, Малм ва бошқа шаҳарларида ҳам ёқилган. Стокгольм ва Уппсалда 13 та машина ёқиб юборилган. Автомобильлардан ташқари, жиноятчилар мопедлар ва автомобиль шиналарини ҳам ёқиб юборган. Жабрланганлар ҳақида хабар берилмаган.
https://twitter.com/lindbergpolemik/status/1029109507228676096
Ёнғинлар кўплаб шаҳарларда 13 август куни соат 21:00 да бир неча дақиқалик фарқ билан бошланган. Сўнгги ёнғин ҳақида қутқарувчилар соат 22:40 хабар олган. Полициянинг тахминича, ёнғинлар бир-бири билан боғлиқ, жиноятчилар эса ўз ҳаракатларини ижтимоий тармоқлар орқали мувофиқлаштирган. Полициячилар ёнғинлар жойида бўлган бир неча йигитни сўроқ қилган, бироқ уларнинг ҳодисаларга алоқасини исботлашга муваффақ бўлинмаган. 14 август куни эрталаб полицияда бирорта ҳам гумонланувчи бўлмаган.
Полиция 13 августда юз берган ёнғинларни сўнгги вақт ичидаги энг кенг қамровлиси деб атамоқда.
Изоҳ (0)