Ўзбекистонга янги автомобиль ишлаб чиқарувчиларни имтиёзлар орқали жалб қилишмоқчи, деб ёзади Spot норматив-ҳуқуқий ҳужжатлар порталида эълон қилинган лойиҳага таяниб.
Ҳужжат орқали автомобилларни «саноатлашган йиғиш» билан шуғулланувчи автомобиль саноати корхоналари учун бир хиллаштирилган солиқ ва божхона имтиёзларини қўллаш таклиф қилинмоқда.
Лойиҳада «саноатлашган йиғиш» йўли билан автомобиль ишлаб чиқаришни ташкил этишни кўзда тутувчи инвестиция лойиҳалари бўйича лойиҳаолди ҳужжатларни ишлаб чиқишга, истисно тариқасида, дастлабки техник-иқтисодий асоссиз рухсат бериш таклиф этилмоқда.
Саноатлашган йиғиш — технологик жараёнлар асосида моторли транспорт воситаларини серияли ишлаб чиқариш бўлиб, лойиҳавий ишлаб чиқариш қувватларини таъминлайди. Буларга пайвандлаш, кузовники йиғиш ва бўяш, салон ускуналарини монтаж қилиш, экстерьер элементларини монтаж қилиш, куч агрегати ва руль механизмини монтаж қилиш ва бошқалар киради.
Шунингдек, солиқ ва божхона режимларини бир хиллаштириб, бундай ишлаб чиқарувчиларни қуйидаги тўловлардан озод қилиш кўзда тутилган:
- даромад солиғи, қўшилган қиймат солиғи, юридик шахслардан олинадиган мулк солиғи, микрофирма ва кичик корхоналар учун ягона солиқ тўлови;
- қурилма ва асбоб-ускуна, хом ашё, материаллар ва бутловчи қисмлар, қурилиш материаллари учун божхона тўловлари (божхона расмийлаштируви учун йиғимлардан ташқари).
Изоҳ (0)