2018 йил январь июль ойлари якунларига кўра, Ўзбекистонда ташқи савдо айланмаси 17,8 миллиард АҚШ долларини ташкил этиб, ўтган йилнинг шу даврига нисбатан 24,2 фоизга ўсди. Шу жумладан, экспорт ҳажми 7,6 миллиард АҚШ долларга (ўсиш суръати 15,7 фоиз) ва импорт ҳажми деярли 10,2 миллиард АҚШ долларига (ўсиш суръати 31,4 фоиз) етди. Ташқи савдо салдоси минус 2,5 миллиард АҚШ долларини ташкил қилди. Бу ҳақда Давлат статистика қўмитасига таяниб, «Газета.uz» хабар бермоқда.
2018 йил январь июль ойларида экспорт ҳажми 7,6 миллиард АҚШ долларга (ўсиш суръати 15,7 фоиз) тенг бўлди. Экспорт таркибида товарлар улуши 77,8 фоизни ташкил этиб, булар асосан энергия манбаалари ва нефть маҳсулотлари (19,2 фоиз), озиқ-овқат маҳсулотлари (8,7 фоиз), шунингдек, кимё маҳсулотлари ва ундан тайёрланган буюмлар (6,9 фоиз) гуруҳлари ҳиссасига тўғри келмоқда.
Жорий йилнинг январь июль ойларида импорт ҳажми 10,2 миллиард АҚШ долларига (ўсиш суръати 31,4 фоиз) тенг бўлди. Импорт таркибида энг катта улуш машина ва асбоб-ускуналар (39,4 фоиз), кимё маҳсулотлари ва ундан тайёрланган буюмлар (13,4 фоиз) ҳамда озиқ-овқат маҳсулотлари (9,6 %) гуруҳлари ҳисобига тўғри келди.
2018 йилнинг январь июль ойларида республикага 145 дан ортиқ хорижий давлатлардан товар ва хизматлар импорти амалга оширилган. Шулардан 5 та энг йирик бўлган Россия, Хитой , Қозоғистон, Жанубий Корея ва Туркия ҳамкор давлатларидан жами импорт ҳажми 6264,5 миллион АҚШ долларига тенг. Бу эса умумий импорт ҳажмининг 61,7 фоизини ташкил қилади.
Изоҳ (0)