12 августдаги тест синовлари натижалари эълон қилинди. Энг юқори ўтиш баллари — Аграр университетнинг Андижон филиалида

Ўзбекистон бош вазири ўринбосари Азиз Абдуҳакимов Ўзбекистон давлат олий таълим муассасаларига кириш тест синовларининг 12-куни натижалари ҳақида ахборот берди.

12 август куни тест синовлари 9 та бинода 3 та олий таълим муассасаларининг 14 та таълим йўналиши бўйича ўтказилган бўлиб, унда 7 377 нафар абитуриент иштирок этган. Турли сабабларга кўра 270 абитуриент тестга келмаган, тартиб қоидаларини бузганлиги сабабли 6 абитуриент тест синовларидан четлатилган.

Давлат гранти бўйича энг юқори ўтиш бали — 111,6 балл — Тошкент давлат аграр университети Андижон филиалининг «Доривор ўсимликларни етиштириш ва қайта ишлаш технологияси» таълим йўналишида қайд этилган. Тўлов-контракт бўйича энг юқори ўтиш бали — 92,2 балл — Тошкент давлат аграр университети Андижон филиалининг «Мевачилик ва узумчилик» таълим йўналишида кузатилган.

12 августдаги тест синовлари якунларига кўра, шу куни давлат грантига ўтишнинг ўртача бали 90,1 баллни, тўлов-контрактга ўтишнинг ўртача бали эса 74,3 баллни ташкил этган. Тест синовлари натижаларини 13 август куни соат 18:00 дан бошлаб ДТМ сайтида текширув мумкин бўлди.