Тошкентнинг Юнусобод туманидаги Aurum 898 тунги клубида эркин курашчи Жамшид Кенжаевнинг ўлими билан тугаган ҳодисадан сўнг шаҳардаги тунги клублар фаолиятида чекловлар пайдо бўлган. Бу ҳақда бир қатор интернет-нашрлар хабар бермоқда.
Репостънинг ёзишича, Aurum 898 тунги клубининг фаолияти тўхтатилган. Ҳозирги вақтда у ерда ҳуқуқни муҳофаза қилиш органлари иш олиб бормоқда. Тунги клуб пештоқидан унинг номи олиб ташланган, реклама баннерлари ечиб олинган. Маълумотларга кўра, тунги клуб ўрнида ё боулинг, ё спорт-соғломлаштириш маркази очилиши мумкин.
UzNews маълумотларига кўра, Aurum 898 даги воқеадан сўнг пойтахтдаги тунги клубларга 23:00 дан кейин ишламаслик ҳақида кўрсатма берилган. Нашр мухбирларига ушбу ахборотни The Time, SMI-bar, Cinzano, «7 пятниц», One More ва бошқа кўнгилочар муассасалар ва тунги клублар вакиллари ҳам тасдиқлаган.
Аммо ушбу ахборотни ҳозирча расман тасдиқлангани йўқ — тегишли органлар ва шаҳар ҳокимлиги сайтида тунги клублар ва бошқа кўнгилочар муассасалар фаолиятига нисбатан бирор чеклов ўрнатилгани ҳақида ахборот берилмаган.
Аввалроқ Давлат солиқ қўмитаси Тошкент шаҳридаги тунги клублар солиқларни аслида тўлаши керак бўлганидан бир неча баробар кам тўлаётгани ҳақида ахборот берган эди.
Изоҳ (0)