ЎзЛиДеП аъзолари Каттақўрғон туманидаги мактабгача таълим муассасаларидаги аҳвол билан танишиш, ҳукумат томонидан яратилаётган имкониятлар ва шарт-шароитлар таълим муассасаларида қай даражада ижро қилинаётгани билан қизиқиб, тумандаги «Яккабоғ» МФЙ ҳудудида жойлашган 27-мактабгача таълим муассасасида бўлди. Бу ҳақда туман кенгаши депутати Рўзимурод Жўраев «Зарафшон» саҳифаларида фикр юритган.
Муассаса ҳовлисига кириб борар эканмиз, бу даргоҳ анчадан буён соҳа мутасаддиларини эътиборидан четда қолиб келаётганлигига гувоҳ бўлдик. Жуда ачинарли ҳолатга келиб қолган ҳовли сатҳини бегона ўтлар босиб кетган. Рангин ҳолатга келиб қолган деворлар оқланмаганига анча бўлган кўринади. Муассаса атрофини ўраб турган деворлар сувоқлари кўчиб, ғарибона кўринишга келиб қолган. Ҳовли манзарасининг ўзиёқ киши кайфиятига салбий таъсир кўрсатади.
Рўйхат бўйича тарбияланаётган 135 нафар болага 18 нафар тарбиячилар илк таълим-тарбия жараёнларини олиб боришмоқда. Болажонлар жойлаштирилган хоналардаги аҳвол ҳам кўнгилдагидек эмас. Тарбияланувчиларнинг ётоқхонаси ҳам машғулот ўтиш, ҳам овқатланиш учун мослаб қўйилган. Болалар ётиб ухлайдиган каравотчаларнинг аксарияти таъмирга муҳтож. Устига солиб қўйилган чойшаблар жуда ҳам эскириб кетганидан яроқсиз аҳволга келиб қолган. Боғча ходимларининг таъкидлашича, охирги марта 2015 йилда келтирилган чойшаблардан фойдаланиб келинаётган экан.
Қишлоқ болалари тарбияланаётган муассасадаги аҳвол нега бу даражада ночорлашиб қолди? Мамлакатда соҳага катта эътибор қаратилаётган бир пайтда яккабоғлик болажонлар тақдирига нега бефарқ қаралмоқда?
Кузатувларимиз асносида яна шу нарсага амин бўлдикки, тарбиявий жараёнларда санитар-гигиеник аҳвол ҳам эътибордан четда қолган. Тарбияланувчиларнинг кийим-бошлари кир ҳолатда. Масалага чуқурроқ ёндошиб, тарбиячиларнинг тиббий кўрикдан ўтган ё ўтмагани билан қизиққанимизда «тиббиёт дафтарчаларимиз мудирада» деган жумбоқли жавоб олдик. Ваҳоланки, боғча мудираси бир ҳафтадан буён ишга келмаётган экан! Раҳбар ишга қўнимсиз бўлганидан кейин ходимлардан нима умид қилиш мумкин?
Бу борада туман мактабгача таълим бўлими раҳбарияти билан гаплашганимизда ушбу боғча мудираси ишдан кетганини, ўрнига янги мудира тайинлангани билан вазиятни хаспўшлашга уринди.
Боғча ошхонасидаги шарт-шароитлар билан танишар эканмиз, бу ердаги ҳолат санитария қоидалари ва гигиена талаблари (СанПин)га мутлақо жавоб бермаслигига гувоҳ бўлдик. Тоза ичимлик суви таъминотининг йўқлиги эса вазиятни янада мураккаблаштиради. Ҳолатга изоҳ сўраб суҳбатлашайлик, десангиз, бутун бошли боғчада бирорта масъул мутасаддини учратиб бўлмади.
Келтирилган озиқ-овқат маҳсулотларини сақлаш масаласида ҳам имкониятлардан келиб чиқилмоқда. Энг ёмони, болалар гигиеник талабларга мутлақо жавоб бермайдиган ҳожатхонадан фойдаланмоқда. Спорт майдончалари, тарбияланувчиларни ёзги мавсумда ташқарида машғулот олиб бориш жойлари ҳақидаку гапирмасак ҳам бўлади.
Йиллар давомида эътибордан четда қолиб келган таълимнинг илк босқичи — мактабгача таълим муассасаларида муаммолар керагидан кўп йиғилиб қолгани сабабли тизимда катта ислоҳотлар бошланди Нега энди Каттақўрғон туманидаги аксарият қишлоқ боғчаларидаги аҳвол ўнгланмаяпти?
Изоҳ (0)