Жорий йилнинг ўтган даврида Сурхондарё вилоятида умумий жиноятлар ўтган йилнинг шу даврига нисбатан камайди. Жиноят содир этилмаётган маҳаллалар сони ҳам кенгаймоқда. Бу ҳақда ЎзА хабар берди.
Бироқ вилоятда баданга қасддан оғир, ўртача даражада шикаст етказиш жинояти кўпайгани қайд этилди. Масалан, Шеробод туманининг «Меҳнатобод» маҳалласида яшовчи ишсиз, ўттиз ёшдаги А.Ёмғиров (исм-шарифлар ўзгартирилди) 42 ёшдаги маҳалладоши Ф.Нолиевни «томорқамдаги бедани ўриб, пайҳон қиляпсан», деб қўлидаги ўроқ билан дуч келган жойига уриб, унинг ҳаёти учун хавфли тан жароҳатини етказади.
Ангор туманидаги «Зартепа» маҳалласида 56 ёшдаги С.Ярашев ўз уйида маҳалладоши 57 ёшдаги Қ.Муталов билан спиртли ичимлик истеъмол қилади. Ширакайф бўлгач, мезбон ҳам, меҳмон ҳам ёшлик даврини қумсаб, куч синашмоқчи бўлади. Хонада ўзаро кураш тушаётганида бир-бири билан тортишиб қолади. Шу пайт С.Ярашев ҳовлига чиқиб, тандир ёнида турган темир косов билан меҳмоннинг юзи ва тана аъзоларига уриб, оғир тан жароҳати етказади.
Термиз шаҳрида яшовчи 26 ёшдаги С.Турдиев Қумқўрғон тумани «Сурхон соҳили» маҳалласида яшовчи онасидан ҳол-аҳвол сўраш учун унинг уйига борганида онаси билан ажрашиб кетган, шу маҳаллада яшовчи отаси Т.Низомов жанжал чиқаради. Шу пайт Термиздан борган ўғли стул билан отасининг бош ва бадан соҳаларига уриб, ҳаёт учун хавфли бўлган оғир тан жароҳатлари етказади.
Денов туманидаги «Чим» маҳалласида яшовчи Н.Чориева эса 56 ёшдаги қайнона О.Қозиевани дўппослаб, ўртача оғирликда тан жароҳати етказди.
Мазкур ҳолатлар юзасидан жиноят ишлари қўзғатилди.
Изоҳ (0)