Солиқ идоралари томонидан ўтказилган хронометраж ва таҳлил натижалари Тошкент шаҳридаги тунги клубларда солиқ тушумлари энг камида ўртача 4 баробаргача яширилаётганлигини кўрсатди. Бу ҳақда «Газета.uz» хабар қилди.
Давлат солиқ қўмитаси матбуот хизматига кўра, тунги клубларнинг барчаси ягона солиқ тўловчиси бўлиб, улар томонидан жорий йилнинг биринчи ярим йиллигида бюджетга 1,3 миллиард сўм ёки ойига ўртача 226 миллион сўмдан солиқ тўланган. Текширувлар эса 6 ой давомида ҳақиқий тушум 54,2 миллиард сўмни ташкил этишини кўрсатди.
Корхоналар томонидан ҳисоботларида жами товар айланмаси ҳажми 13,6 миллиард сўмни ташкил этгани кўрсатилиб, орадаги фарқ суммаси 40,6 миллиард сўмдан иборат. Бу 4,1 миллиард сўм солиқлар бюджетга тўланмади дегани.
Шунингдек, ўрганишлар жараёнида ҳар бир тунги масканларда мижоз томонидан бир дона столни банд қилиш учун норасмий мажбурий буюртма (обязаловка) мавжудлиги аниқланган. Ушбу йўналиш бўйича олиб борилган ҳисоб-китобларга кўра, ўртача бир киши битта столни банд қилиши учун 137,4 минг сўмлик тўловни амалга ошириши лозим.
Ўриндиқлар сони ўртача 50 тадан ҳисобланганда бир кунда 254,2 миллион сўм ва бир ой давомида шундай фаолият амалга оширилса 7,6 миллиард сўм, 6 ой давомида эса 45,7 миллиард сўмни ташкил этади. Бу яна 4,5 миллиард сўм солиқ дегани.
Булар ҳали ҳаммаси эмас. Тунги клублар ҳисоботларда ишлаётган ходимларини 10−11 нафардан кўрсатган бўлсада, ҳақиқатда 20−25 нафар ходим меҳнат қилади. Уларга ҳам конвертда берилаётган иш ҳақига даромад солиғи ҳисобланадиган бўлса, ўртача 250 миллион сўмга яқин солиқ суммалари тўланмагани маълум бўлади.
Давлат солиқ хизмати органлари томонидан барча субъектларга нисбатан огоҳлантириш хатлари юборилиб, назорат тадбирлари давом эттирилади.
Изоҳ (0)