«КамАЗ» Ўзбекистон ҳарбий қисмлари учун юк машиналари ишлаб чиқаришни 10 баробарга оширди

Ўзбекистон ўз ҳарбий қисмлари учун 1,1 минг дона «КамАЗ» юк машиналарига буюртма берди. Бу ҳақда «Халқ сўзи» хабар бермоқда.

Тошкент вилояти ҳокими Ғуломжон Ибрагимов Татаристон президенти Рустам Миннихонов билан қатор қўшма лойиҳаларни муҳокама қилди. Бу борада «КамАЗ» юк машинаси техникаларини етказиб бериш линияси бўйича таклифлар ҳам кўриб чиқилди.

Ўзбекистонда ўтган йил охирида ушбу бренд остида транспорт воситаларини ишлаб чиқариш йўлга қўйилганди.

«Уларни Самарқандда йиғиш бошланди. Илк 100 та машина йиғилди, ҳарбийлар уларни кўрди. Жорий йилда буюртмалар сони 1100 та машинага етди», — деди Тошкент вилоят ҳокими Татаристон президенти билан Қозондаги учрашуви давомида.

Учрашувда Тошкент вилоятида «КамАЗ» юк машиналарига сервис хизматлари кўрсатиш бўйича марказ очиш режаси ҳам муҳокама қилинди.

Маълумот учун, «Ўзавтосаноат» АЖ ва «КамАЗ» ўртасидаги келишув Россия бош вазири Дмитрий Медведевнинг Ўзбекистонга ташрифи давомида имзоланган эди.