Қорақалпоғистоннинг Беруний туманидаги «Шоббоз» ҳафталик деҳқон бозорида фуқаро У.А. 1 август куни соат 6:00 атрофида ўғриликда гумон қилинган шахс — Д.Н. бозор дарвозаси устунига осиб қўйган. Бу ҳақда, Қорақалпоғистон ИИВ ахборотига асосланиб, Ўзбекистон ИИВ Жамоатчилик ва оммавий ахборот воситалари билан алоқалар бошқармаси маълум қилди.
2 август куни ижтимоий тармоқларда Қорақалпоғистоннинг Беруний туманидаги «Шоббоз» ҳафталик деҳқон бозорида ўғриликда гумонланган шахснинг арқон билан қўлларидан бозор кириш дарвозаси устунига осиб қўйилган ҳолати видеоси тарқалган эди. Қорақалпоғистон Ички ишлар вазирлиги берган маълумотга кўра, бу ҳолат 1 август куни соат 6:00 атрофида фуқаро У.А. томонидан содир этилгани кўрсатилган.
Мавзуга доир: Қорақалпоғистоннинг Беруний туманидаги Шаббоз бозорида ўғриликда гумон қилинган йигит қўлидан осиб қўйилди (видео)
Мазкур ҳолат юзасидан фуқаро У.А.га нисбатан Жиноят кодексининг 229-моддаси («Ўзбошимчалик») билан жиноят иши қўзғатилиб, тергов ҳаракатлари олиб борилмоқда. Ушбу модда бўйича айбдор деб топилган шахс энг кам иш ҳақининг 50 бараваригача миқдорда жарима ёки 300 соатгача жамоат ишлари ёхуд 2 йилгача ахлоқ тузатиш ишлари билан жазоланади.
«Фуқаро Д.Н.нинг ўғрилик жиноятини содир этган ёки этмаганлиги юзасидан терговда аниқлик киритилади ва бу ҳақда тергов якунига кўра қўшимча ахборот берилади», — дейилади ИИВ ахборотида.
Изоҳ (0)