Ўзбекистон Президентининг 2018 йил 10 майдаги «Соғлиқни сақлаш тизимини танқидий ўрганиш ва уни тубдан такомиллаштириш бўйича таклифларни тайёрлашни ташкил этиш тўғрисида»ги фармойиши мувофиқ, Соғлиқни сақлаш вазирлиги томонидан Концепция лойиҳаси тайёрланмоқда. Вазирлик ахборот хизмати хабарига кўра, шу мақсадда Жаҳон соғлиқни сақлаш ташкилоти (ЖССТ)нинг нуфузли делегацияси Ўзбекистонга таклиф этилган.
Айни пайтда Ўзбекистонда бўлиб турган ЖССТнинг Европа минтақавий бюроси етакчи эксперти Мелитта Якаб бошчилигида делегация мамлакатда амалга оширилаётган тиббий-ижтимоий ислоҳотларни ҳар томонлама ўрганиб, соғлиқни сақлаш тизимини тубдан такомиллаштириш бўйича ишлаб чиқилаётган Концепция лойиҳаси юзасидан таклифлар тайёрламоқда. Бундан ташқари, халқаро экспертлар ташриф доирасида Тошкентдаги кўплаб тиббиёт муассасаларида аҳолига тиббий ёрдам кўрсатиш жараёни билан бевосита танишиб, Соғлиқни сақлаш вазирлиги, шунингдек, бир қатор вазирлик ҳамда идораларда мутахассислар билан учрашувлар ўтказмоқда.
Соғлиқни сақлаш вазири Алишер Шодмонов ва делегация экспертлари ўртасида бўлиб ўтган мулоқотда тизимни тубдан такомиллаштиришга қаратилган Концепция лойиҳаси юзасидан кўплаб таклифлар ўртага ташланди. Шунингдек, хориж мамлакатларидаги илғор тажрибаларни чуқур ўрганиш, шу асосда тиббиёт соҳаси тараққиётини янги босқичга кўтариш, ходимларни ижтимоий қўллаб-қувватлашни кучайтириш, малакали мутахассислар тайёрлаш тизимини янада такомиллаштириш борасидаги саъй-ҳаракатлар экспертлар томонидан юқори баҳоланди.
Мулоқотда Ўзбекистон тиббиёт тизимида оқилона стратегия ҳамда устувор йўналишлар белгилаб олинаётгани эътироф этилган ҳолда ушбу тарихий воқеаларнинг гувоҳи бўлиш мақсадида шу йил ЖССТ бош директори Тедрос Гебреесуснинг ташрифи кутилаётгани ҳам маълум қилинди.
«Биз юртингизга ушбу Концепцияни ҳамкорликда тайёрлаш учун келганмиз. Эътиборли жиҳати, сўнгги икки йил ичида Ўзбекистон тиббиётда танлаган ўз стратегияси билан Жаҳон соғлиқни сақлаш ташкилотининг фаол аъзосига айланди. Бундан буён ҳам кўп томонлама ҳамкорлик алоқаларини янада ривожлантиришга тайёрмиз», деди Мелитта Якаб.
Соғлиқни сақлаш вазирлигидан қўшимча қилишларича, Ўзбекистонда фаол иш олиб бораётган мазкур халқаро делегация ташрифи якунлари бўйича мамлакат соғлиқни сақлаш тизимидаги ислоҳотларни ривожлантиришга қаратилган тақдимот ўтказилиши ҳам режалаштирилган.
Изоҳ (0)