Таиландда тунги клубда ишлашга мажбурланган аёл Ўзбекистонга қайтиб келди. У боғчада тарбиячи сифатида ишга жойлаштирилди

Таиландда тунги клубда ишлашга мажбурланган аёл Ўзбекистонга қайтарилди, унга 2,5 миллион сўм кредит берилди, дея «Дарё» мухбири Азизжон Эрматов хабар бермоқда.

Фарғона вилояти Тошлоқ туманида яшовчи 27 ёшли Н.М. бир фарзанди билан оғир шароитда қолган. Аёл танишларининг чет элда ишлаб, мўмай пул топиш ҳақидаги таклифига кўра Россияга бормоқчи бўлган. Бироқ у одам савдосининг қурбонига айланди. Танишлари уни Россияга деб алдаб, Қозоғистон орқали 2017 йил 14 август куни ноқонуний йўллар билан Таиландга жўнатиб юборган. Таиландда М.Ғ. исмли аёл унинг фуқаролик паспортини олиб қўйиб, тунги клубда нопок ишларни қилишга мажбурлайди.

2017 йилнинг 12 сентябрь куни элчихонанинг кўмаги билан Н.М. Ўзбекистонга қайтиб келди.

Н.М.га психологик хизмат кўрсатилди, мутасаддилар томонидан доимий назоратга олинди.

— Вилоят хотин-қизлар қўмитаси томонидан Н.М. мактабгача таълим муассасасига тарбиячи вазифасига ишга жойлаштирилди. Фарзанди эса боғчада бепул тарбияланмоқда. Шунингдек, бу аёлга тикувчилик билан шуғулланиши учун 2,5 миллион сўм кредит берилди. Оғир шароитда яшаётган Н.М.га имтиёзли уй-жой бериш тавсия этилди, — дейди Тошлоқ туман хотин-қизлар қўмитаси раиси Комилахон Кавлонова.