Бугун, 29 июль санасида футбол бўйича Ўзбекистон Pepsi Суперлигасининг 19-тур учрашувлари якунига етди. Кун тақвимидан одатга кўра 3 учрашув ўрин олганди.
19-тур доирасида Қўқонда «Қўқон-1912» Жиззахнинг «Сўғдиёна» жамоасини қабул қилди. Ўйинда ҳисоб иккинчи бўлимнинг 54-дақиқасида мезбонлар аъзоси Қувондиқ Рўзиев томонидан очилди. 76-дақиқада Санжар Рашидов ҳисобни тенглаштиришга эришди. Орадан 6 дақиқа ўтиб, бош ҳакам «Сўғдиёна» дарвозасига пенальти белгилади. Уни эса Мурод Холмуҳаммедов голга айлантирди ва жамоасига навбатдаги 3 очкони тақдим этди. Маълумот учун Мурод ушбу мавсумда пенальтидан 8 та гол уришга эришди ва жамоасининг тўпурари бўлиб турибди.
Яна бир беллашув эса Навоийда бўлиб ўтди. Унда «Қизилқум» «Бухоро» жамоасига қарши кураш олиб борди. Учрашувдаги ягона гол 77-дақиқада «Бухоро» футболчиси Арслонмурод Омонов томонидан киритилди. Шу тариқа «Бухоро» 3 очкога эга бўлди.
Турнинг марказий ўйинларидан бири эса Тошкентда бўлиб ўтди. «Локомотив» «Бунёдкор»ни ўз майдонида қабул қилди. Учрашувда ҳисоб «қалдирғочлар» томонидан 33-дақиқада очилди. Гол муаллифи Хуршид Ғиёсов. Биринчи бўлимнинг сўнгги дақиқаларида Сардор Мирзаев гол уриб, ҳисобни 1:1 бўлишини таъминлади.
Иккинчи бўлимнинг 70-дақиқасида Ўзбекистон чемпионатига қайтган Анзур Исмоилов гол уриб, «Локо»ни ҳисобда олдинга олиб чиқди. 90+1-дақиқада эса Сардор Рашидов «Бунёдкор» дарвозасини ишғол этиб, ўйинга якуний нуқтани қўйди.
Pepsi Суперлига
19-тур беллашувлари
29 июль, якшанба
Изоҳ (0)