​«Навбаҳор» ўз майдонида «Пахтакор»ни таслим қилди, «Насаф» эса АГМКга ҳам ютқазди (видео)

Бугун, 28 июль санасида футбол бўйича Ўзбекистон Pepsi Суперлигасининг 19-тур учрашувлари бошланди. Кун тақвимидан одатга кўра 3 учрашув ўрин олганди.

19-тур доирасида Бекободда «Металлург» Фарғонанинг «Нефтчи» жамоасини қабул қилди. Учрашувнинг 70-дақиқасида Ислом Исоқжонов томонидан киритилган гол мезбонларнинг навбатдаги 3 очкога эга бўлишини, «Нефтчи»нинг эса галдаги мағлубиятини таъминлади.

Турнинг марказий ўйинларидан бири эса Наманганда бўлиб ўтди. «Навбаҳор» мусобақа пешқадами «Пахтакор»ни ўз майдонида қабул қилди. Ўйиндаги ягона гол иккинчи бўлимда киритилди. Ҳозирда «Навбаҳор» сафида тўп сураётган собиқ «пахтакорчи» Шерзод Каримовнинг 52-дақиқада жарима зарбасидан узатган тўпини Игорь Голбан Элдор Суюнов дарвозасига жойлаб қўйди. Шу тариқа «Навбаҳор» навбатдаги уч очкони қўлга киритди.

Таъкидлаш жоиз, мазкур учрашувда баҳрайнлик Наваф Шукрулла бошчилигидаги ҳакамлар гуруҳи ишлади.

Яна бир беллашув эса Қаршида бўлиб ўтди. Унда «Насаф» Олмалиқнинг АГМК жамоасига қарши кураш олиб борди. Учрашувда ҳисоб иккинчи бўлимнинг 49-дақиқасида АГМК жамоаси футболчилари томонидан очилди. Жасур Ҳасановнинг узатмасини Музаффар Музаффаров голга айлантирди. 62-дақиқада эса Зоҳир Пиримов ҳисобни 0:2 кўринишига келтирди. Ўйин шу ҳисобда якунланди. АГМК эса ўз тарихида илк бор «Насаф»ни Қаршида енгишга эришди.