Ўзбекистонда жорий йил 6 ойи мобайнида умумий жиноятчилик 38,7, жумладан, талончилик 58,8, босқинчилик 58,6, безорилик 50,1, товламачилик 45,5, ўғрилик 44,4, фирибгарлик 39,2, қасддан баданга оғир шикаст етказиш 17,7 ва қотиллик 17,6 фоизга камайди. Бу ҳақда Бош прокуратура матбуот хизмати маълум қилди.
Ўтган олти ойда Идоралараро тезкор-қидирув гуруҳи томонидан 4 минг 270 оғир ва ўта оғир жиноятлар фош этилди. Жиноятни ҳисобдан яшириш бўйича 662 ҳолат аниқланди, шунингдек, жиноят ҳақидаги ариза ва хабарларни қасддан яширган 20 шахсга нисбатан жиноят иши қўзғатилди. Қидирувдаги 2 минг 295 шахс ушланди. Бедарак йўқолганлик ҳақидаги 150 дан ортиқ материаллар ўрганилиб, тегишли қарорлар қабул қилинди ва жиноят ишлари қўзғатилди.
Бевосита прокуратура органлари томонидан 148 минг 29 мурожаат кўриб чиқилди, 141 минг 830 фуқаро қабул қилинди. Натижада судларга 7,4 миллиард сўмлик зарарни ундириш ҳақида 579 ариза берилди. Минг нафар шахс интизомий ва маъмурий жавобгарликка тортилди. Қўпол қонунбузилиши ҳолатлари бўйича 147 жиноят иши қўзғатилди. 23,9 милиард сўмлик иш ҳақи, пенсия, алимент ва бошқа тўловларни олишда амалий ёрдам кўрсатилди.
Иқтисодий жиноятлар, хуфиёна иқтисодиёт ва коррупцияга қарши курашни кучайтириш бўйича кўрилган чоралар натижасида 4 минг 19 ҳуқуқбузарлик аниқланиб, 1 минг 886 маъмурий ва 2 минг 114 жиноят иши қўзғатилди.
Ўтказилган тадбирлар натижасида 557 яширин цех юритиш билан боғлиқ жиноят ишлари қўзғатилди. 1884 субъэктнинг фаолиятига қонуний тус берилиб, бунинг натижасида 2 мингдан зиёд янги иш ўрни яратилди. Порахўрликка қарши курашиш борасида 445 та жиноят аниқланди.
Тиббиёт буюмлари ва дори-дармон билан савдо қилиш қоидалари ҳамда нархларни белгилаш тартиби бузилишининг олдини олиш мақсадида савдо қоидалари ва нархларни белгилаш билан боғлиқ 82 ҳолат аниқланди.
Изоҳ (0)