2018 йилда Ўзбекистонда қайси маҳсулотлар энг кўп экспорт қилинди?

2018 йилнинг биринчи ярмида Ўзбекистон томонидан экспорт қилинган маҳсулотлар рўйхати эълон қилинди, деб хабар беради «Халқ сўзи».

Унга кўра, энг кўп экспорт қилинган маҳсулотлар орасида биринчи ўринда табиий газ бўлиб, йил бошидан буён маҳсулотнинг экспорт қиймати 1 миллиард 139 миллион 948,1 минг долларни ташкил қилди. Кейинги ўринларда мева-сабзавотлар (463 миллион 198,1 минг доллар) ва ип-пахта маҳсулотлари (381 миллион 039 минг доллар) жойлашган.

Пахта толасининг экспорт ҳажми эса 166 миллион доллар бироз кўпроқ қийматни ташкил қилган. Шунингдек, Ўзбекистонда ишлаб чиқарилган автомобиллар экспорт ҳажми бўйича мамлакатдаги маҳсулотлар ичида бор-йўғи 15-ўринда қайд қилинган — 22 миллион 164,2 минг доллар.

Олти ой давомида экспортнинг умумий ҳажми 7 793 421,1 минг долларни ташкил этган.