18 июль куни «Россия 24» телеканалининг хабарлар дастурида «Клязьмадаги маънолар ҳудуди» форуми ҳақида сюжет кўрсатилди, унда тиббиёт соҳасидаги инновациялар муҳокама қилинган, деб ёзади TJournal. Журналистларга болалар эндокринологи, Россия Соғлиқни сақлаш вазирлиги Эндокринология миллий тиббий тадқиқот маркази илмий ходими Мария Воронцова интервью берди. Бунгача у Россия телеканаллари эфирларида ҳеч қачон чиқмаган эди.
ОАВлар Воронцовани Владимир Путиннинг тахминий тўнғич қизи деб атамоқда. У «Россия 24» мухбирига рақамли тиббиёт истиқболлари ҳақида гапириб берди.
Воронцованинг ҳаёти ҳақида кўп нарса маълум эмас. Reuters маълумотларига кўра, у 1985 йил 28 апрелда туғилган ва бир неча марта фамилиясини ўзгартирган.
The New Times ахбороти бўйича, қиз Москва давлат университетининг фундаментал тиббиёт факультетида 2006 йилдан 2011 йилгача «Воронцова» фамилияси остида таҳсил олган. Ушбу исм-шарифдан ташқари, Мария Путина яна тўрт хил фамилиядаги ҳужжатлардан фойдаланган.
Путиннинг тўнғич қизи голландиялик тадбиркор Йоррит Фаассенга турмушга чиқиб, унинг фамилиясига ўтган. Фаассен 2007 йилда «Газпром»да бизнесни ривожлантириш бўйича директор лавозимини эгаллаган, аммо кейинроқ компанияни тарк этиб, консалтинг соҳасига ишга ўтган эди (у яқин вақтгача «МЕФ Аудит» директорлар кенгашини бошқарган).
Эслатиб ўтамиз, 2015 йилда Путиннинг иккинчи қизи — Катерина Тихонованинг Кирилл Шамалов билан тўйи 2013 йилда бўлиб ўтгани ҳақида хабар берилган эди.
Путин ўз қизлари ҳақида хавфсизлик каби нуқтаи назарлардан гапириб ўтирмаслигини таъкидлаган. «Улар бизнес ва сиёсат билан шуғулланмайди. Улар ҳеч қаерга бурнини суқмайди», — дейди Путин.
Изоҳ (0)