Person Hunters МЧЖ директори Жаҳонгир Муҳаммаджонов меҳнат муҳофазаси соҳасидаги хизматлар бозоридаги муаммолар, компания дуч келаётган муаммоларни «Дарё» билан бўлишди.
Шундай қилиб, хорижга ишчиларни юборадиган компанияларга лицензия бериш тўғрисидаги қонун қабул қилинди. Жузъий тузатишлар ҳам киритилди, тадбиркорлар қарши чиққан асосий бандлар – хориждаги ишчиларни ҳимоя қилиш жамғармасига 50 000 доллар ўтказиш ва компания Устав жамғармасининг миқдори 100 000 доллар бўлиши ҳақидаги бандлар қолдирилди. Биз — Person Hunters компаниясининг ходимлари тез орада ҳисобот даврида лицензия олиши керак бўлган агентликлар сонини диққат билан кузатиб боряпмиз. Реестр ҳамма учун очиқ бўлади, деган умиддамиз. Ўзимиз эса ҳозирча чеккада туришни маъқул кўрдик, чунки янги қонун бўйича тадбиркор учун тушунарсиз бўлган ва ўзини оқламайдиган таваккаллар жуда кўп. Консалтинг бўйича фаолиятимизни давом эттирамиз. Вазирликдан лицензия ёки аккредитация олиш шунчаки «квест» эмас, балки ўтиб бўлмас босқичга айланган.
Аккредитацияни қандай олганимиз ҳақида
Ўтган йил июль ойида ВМнинг № 246-сонли қарори кучга кирган эди. Унинг мақсади меҳнат муҳофазаси соҳасидаги хизматлар бозорини ривожланиришдан иборат. Узоқ кутилган ҳамда меҳнат муҳофазаси соҳасидаги хизматлар бозорининг профессионал иштирокчиларини ривожлантириш шароитларини яратиш учун жуда зарур бўлган қонун. Бироқ бу қонун лойиҳасининг ижроси нима бўляпти? 2017 йил сентябр ойида бизнинг «Profi Staff Samarkand» МЧЖ ташкилотимиз Person Hunters бренди остида ходимларни меҳнат муҳофазаси мутахассислари — меҳнат муҳофазаси соҳасидаги бозор иштирокчилари сифатида ўқитишга ариза берди. Биз шартнома туздик ва таълим ҳақини (бир киши учун энг кам иш ҳақининг 10 баробари миқдорида) тўлаб, 72 соатлик дастур бўйича ўқидик. Таълим якунларига кўра муайян мавзуларда рефератлар бажарилди ва ҳимоя қилинди (реферат ҳажми камида 25 босма варақ), тестдан ўтилди, тўрт кишидан иборат малака комиссиясига оғзаки имтиҳон топширилди (чиптада меҳнат муҳофазасига доир барча қонунчилик, норматив-техник ва санитария-гигиена талаблари бўйича бешта савол ўрин олган).Муайян муддат ўтганидан кейин бизга ВМнинг № 246-сонли қарорига 2-илова талабларига жавоб берадиган сертификатлар топширилди. Демак, юқорида кўрсатилган ВМнинг қарорида белгиланган барча талаблар бажарилди; зарур билимларга эга бўлинди, 4 нафар ходимимиз меҳнат муҳофазаси бўйича мутахассис сертификатини олди, норматив-маълумот ҳужжатлар базаси тақдим этилди.
Сертификат — кераксиз қоғоз
2017 йил декабрь ойида биз ташкилотимизни Меҳнат муҳофазаси соҳасидаги хизматлар бозори профессионал иштирокчиларининг Ягона реестрига киритиш учун ҳужжатлар тўпламини тақдим этдик. Қизиғи шу ерда бошланди: даставвал бизга лабораторияга аккредитация тақдим этмаганимизни билдиришди, аммо реестрга кириш учун берилган аризада меҳнат шароитлари бўйича иш ўринларини аттестациядан ўтказмаслигимиз ва шу боис бизда лаборатория йўқлиги ва бўлмаслиги аниқ кўрсатилганди. Эски «ўйинлар»: хатларимизга жавоб бермай қўйишди (телефонда эса жавоб почта орқали юборилганини айтишди, бироқ маълум бўлишича, жавобларни юборишмаган ҳам, улар ҳамон девонхонада ётибди). Кейин бизга реестрга кириш ва аккредитациядан ўтиш учун имтиҳон топширишимиз кераклигини билдиришди. «Қандай имтиҳон, ахир биз бу босқичдан ўтганмиз, қўлимизда ВМнинг қарори талабларига жавоб берувчи сертификатлар бор-ку»?, деган саволимизга қуйидаги жавобни олдик. Маълум бўлишича, қўлимиздаги сертификатлар такрор имтиҳондан ўтиш ҳуқуқини берувчи сертификатлар экан, уларнинг ҳеч қандай кучи йўқмиш, умуман олганда эса, улар оддий «қоғоз» дейишди. Яъни ҳукумат қарори билан тасдиқланган сертификат ҳеч қандай аҳамиятга эга бўлмаган оддий «қоғоз»ми?
Бизнинг фойдамизга қарор чиқарган суд ҳам ёрдам бермади
2018 йил май ойида Фуқаролик ишлари бўйича Миробод туман судига даъво аризасини бердик. Адлия вазирлиги билан маслаҳатлашувлардан кейин суд биз ҳақ эканимиз, Бандлик вазирлиги биздан ВМнинг қарорида белгиланмаган жараёнларни бажаришни ноқонуний талаб қилаётгани ҳақида қарор чиқарди. Аммо суд қарори ҳам вазирлик учун «бекорчи гап» бўлиб чиқди.Натижасиз учрашувлар
Шундан сўнг биз вазирликнинг масъул ходимлари билан икки марта учрашдик, аммо гапимиз қовушмади. «Такрор имтиҳон топшириш нега керак, бу қайси ҳужжат билан белгиланган?» деган саволларни бердик. Даставвал бизга корхоналарда меҳнат муҳофазаси бўйича мутахассис сифатида ишлаш ҳуқуқини берадиган 36 соатлик дастур бўйича ўқиганлик тўғрисидаги сертификат адашиб берилганини айишди. Бироқ корхоналарда меҳнат муҳофазаси бўйича муҳандис лавозимини тасдиқлаш учун малакавий талаблар Меҳнат ва аҳолини ижтимоий ҳимоя қилиш вазирлиги коллегиясининг 2016 йил 28 январдаги 1-сонли қарори билан қабул қилинган ва жорий этилган. Бизга бир ҳафта, кўпи билан 10 кун ичида сертификатларимиз бошқасига, яъни кейинги жараёнлар (реестрга киритиш ва ҳоказо) билан олган таълимимизга тўғри келадиганларига алмаштириб берилишини айтишди. Учрашув июнь ойининг бошида ўтказилганди. Кейинги учрашувимизда эса биз билан гаплашган ўша ходим ишдан бўшагани маълум бўлди. У бизга айтган гаплар ҳақида эса ҳеч кимнинг хабари йўқ ва шу боис ҳеч ким жавоб бермас эмиш.21 июнь куни бўлиб ўтган навбатдаги учрашувни вазирнинг биринчи ўринбосари олиб борди. Кўрсатилган ноқулайликлар учун биздан узр сўрашди ва маънавий зарар компенсацияси сифатида навбатсиз ва (диққат қилинг!) энг кам иш ҳақининг икки баробари миқдоридаги давлат божини тўламасдан имтиҳон топширишни таклиф қилишди. ВМнинг № 246-сонли қарори, 28-банд: Ягона реестрга киритишга аризаларни кўриб чиққанлик ва гувоҳнома берганлик учун тўлов ундирилмайди. Бу тўлов қаерда ва ким томонидан белгиланган?
Хулоса
Биз сертификат олган кундан бошлаб ўтган 8 ой ичида меҳнат муҳофазаси бўйича ишларни олиб боришга шартномалар тузилмагани сабабли жиддий молиявий зарар кўрдик. Энг муҳими, улар саноатимиз ва иқтисодиётимиз ривожига ўз маблағларини йўналтириш истагида бўлган хорижий инвесторлар эди. Уларга бу ҳолатни қандай тушунтирайлик?Ўқишни ўтадикми — ҲА, имтиҳонларни топширдикми — ҲА, сертификатлар борми — ҲА, унда нега ишлаш мумкинмас? Тажрибаси бор одамлар ишлашни хоҳлайди, МЕҲНАТ МУҲОФАЗAСИ— мураккаб соҳа, унда одамларга пул осмондан тушмайди, уни ўзининг билими ва амалий тажрибаси билан ишлаб топади. Буларнинг ортида эса ўз меҳнати билан мамлакат учун моддий неъматлар яратаётган инсонларнинг ҳаёти ва соғлиғи турибди.
Изоҳ (0)