Ҳаво ҳарорати юқори даражани кўрсатаётган шу кунларда «Обод маҳалла» дастурига кирган Янгийўл туманининг А. Ортиқов номидаги қишлоқ фуқаролар йиғинининг Чортоқ маҳалласида сув муаммоси авжига чиқмоқда. Бу ҳақда «Халқ сўзи» хабар бермоқда.
Маҳалла ҳудудида аҳолига сув етказиб бериш учун ўрнатилган сув чиқариш насоси Янгийўл тумани ДУК «Сувсоз» балансида бўлиб, намунавий уй-жойларга аҳоли кўчиб келганидан буён ҳар йили мазкур насос 3-4 марта куйиши натижасида ишдан чиқиб тураркан.
Эндиликда маҳалла аҳли уйига кичик насос ўрнатган кишининг ҳовлисида навбатда туриб ўз идишларига сув олишга мажбур бўлишмоқда.
«Кўчиб келганимизга тўрт йил бўлди. Чортоқ маҳалласининг 29-хонадонида яшайман. Тўрт йилдан бери сув танқислиги, чироқ ўчиб туриши ҳамда қиш фаслида газ муаммоси бизни қийнаб келмоқда. Икки ҳафта сув бўлса, бир ой бўлмайди. Ичаётган сувимиз ҳам ичишга яроқли эмас», — дейди Раъно Бегалиева.
Абубакр Мўминов эса чиқиндилар муаммоси ҳал бўлмаётганини айтса, бошқаси яқин атрофда на мактаб, на боғча, на поликлиника борлигидан шикоят қилади. Аммо уларнинг маҳаллий ҳокимлик вакиллари йўлига кўз тутишлари ҳам бесамар кетмас, ҳадемай уларнинг қораси кўриниб қолса, ҳаммаси яхши бўлиб кетишига умид одамларга далда бериб турибди.
Изоҳ (0)