Жорий йилнинг 3-14 июль кунлари Руминиянинг Клуж-Напока шаҳрида ўтказилган Халқаро математика олимпиадасида (International Mathematical Olympiad, IMO) Ўзбекистон жамоасидан 3 нафар ўқувчи қаллобликда гумонланиб, олимпиададан четлаштирилди. Бу ҳақда UZ24 хабар бермоқда.
Ҳозиргача бундай вазият фақат икки марта, 1991 ва 2010 йилларда Шимолий Корея жамоаси билан содир бўлган.
IMO 1959 йилдан буён (1980 йилдан ташқари) ҳар йили ўтказилиб келинади ва ўқувчилар ўртасидаги барча математика олимпиадалари ичида энг обрўлиси ҳисобланади. Ўзбекистон терма жамоаси 1997 йилдан 2008 йилгача (2003 йилдан ташқари) Марказий Осиё давлатлари ўртасида иккинчи ўринни эгаллаб келган. 2011 йилдан бошлаб эса 4–5-ўринларга тушиб кетган. Охирги уч йил ичидаги умумжамоа ҳисобида 110 давлат орасида ўртача 77, 74, 86-ўринларни эгаллаб келинмоқда.
Бу йил расмий натижалар чиқишидан аввалроқ таблодаги умумий натижалар расмга олиниб, интернетда тарқалди. Унга кўра, Ўзбекистонда камида 2 та кумуш медали бўлиши керак эди.
Сал ўтмай, расмий натижалар IMO сайтига жойлаштирилди. Унда эса бутунлай бошқа вазият — фақат 2 та фахрий ёрлиқ билан чегараланилган ва 6 ўқувчидан 3 нафари умуман кўрсатилмаганини кўриш мумкин.
IMO президенти Жофф Смит ўз баёнотида бу йилги олимпиадада Ўзбекистон жамоаси билан айнан нима бўлгани ҳақида тўхталиб, хусусан, шундай деди:
—IMO 2018 да масала капитани қийин масалани битта давлатдан (Ўзбекистон) бўлган учта қатнашчи бир-бирига жудаям ўхшаш йўл билан ечганлиги ва бунда эҳтимолий қонун бузилиши бўлганлиги ҳақида хабар берди. Ахлоқ (этика) қўмитаси вакиллари ва IMO кенгашидан сайланган аъзолар томонидан текширувлар ўтказилиб ҳамда шу давлат терма жамоаси етакчиси билан муҳокамалар олиб борилиб, IMO ҳакамлар ҳайъатига тавсия берилди.
Ҳайъат муаммодан келиб чиқиб, ўқувчилар ечимларини ва алоқадор ҳисоб-китобларини ўрганиб чиқди. Жамоа етакчиси ечимдаги ўхшашликларни (чизмалар, методлар, тригонометрия ва масаланинг ечилиш тартиби) ўқувчилар битта мактабда ўқиганлиги ва битта ўқитувчидан дарс олганлиги билан изоҳлади.
Ҳайъат бунга ишонмади ва кўпчилик овоз билан уччала ечим ҳам ноқонуний манбага таянади деб топди. Жамоанинг бошқа қатнашчилари ва етакчилари томонидан қонун бузилишига алоқадорлик бўйича ҳеч қандай далил бўлмагани учун уларга нисбатан чора кўрилмади. IMO 2018 дан ушбу қатнашчиларни четлаштиришга қарор қилинди ва улар олимпиадада умуман қатнашмаган деб топилганлигига асосланган ҳолда охирги натижалар таҳлил қилинди ва медаллар тақсимланди.
Ҳозирча Ўзбекистон жамоаси етакчиси Шуҳрат Исмоилов ёки бошқа қатнашчилар томонидан ушбу ҳолат юзасидан ҳеч қандай расмий баёнот берилмади.
Изоҳ (0)