Тожикистон ҳукумати ҳузуридаги атроф-муҳитни муҳофаза қилиш қўмитаси раҳбари Талбак Салимов Сарез кўли сувини сотишни таклиф қилди. Бу ҳақда Sputnik хабар бермоқда.
Салимов бунга муҳтож бўлган давлатларга сувни сотиш зарурлигини билдирмоқда. Унинг айтишича, кўлни сувсиз қолдириш Тожикистонга зарар етказмайди: республика етарли сув ресурсларига эга.
Қўмита раҳбари «Сарез муаммосини» имкон қадар тезроқ ҳал қилиш кераклигини таъкидлаб ўтди. Чунки кўл юқори даражадаги хавф зонаси бўлиб қолмоқда.
«Биз фожиа қачон бўлишини билмаймиз — бугун, эртага, бир йилдан кейин», — деб қўшимча қилди Талбак Салимов.
Маълумот учун, Сарез кўли Тожикистоннинг Тоғли-Бадахшон автоном вилояти Мурғоб туманида жойлашган. Узунлиги 70 километр, чуқурлиги 500 метрга яқин, умумий ҳажми 17 квадрат километрни ташкил қилади. Сейсмик фаол ҳудудда жойлашган мазкур кўл тошиб кетса улкан сув массаси деярли Орол денгизигача етиб бориши мумкин.
Изоҳ (0)