Самарқанд шаҳар «Сўғдиёна» массивидаги Абу Бакр Розий кўчасида тоза ичимлик суви беҳуда оқиб ётганлиги тўғрисида хабар бергандик.
Тўрт ойдирки кўчанинг қоқ марказидан ўтувчи тоза ичимлик суви қувурлари ёрилиб, равон йўллар яна эски ҳолатига келиб қолганлиги тўғрисдаги «Дарё» хабар эълон қилганидан сўнг, Самарқанд шаҳар сувоқова ташкилоти томонидан ушбу ачинарли ҳолатга барҳам берилди, деб хабар бермоқда «Дарё» мухбири Фарҳод Норбўтаев.
«Ўтган йилнинг ноябрь ойидан ушбу кўча бошидаги сув қувурларидан сув сизиб чиқишни бошлаган эди. «Хавос» деб номланган янги сув қувирлари қишнинг совуқ кунларида ёрилиб шикаст еган. Биз бу қувурни ноябрь ойидан кейин тўрт маротаба янгиладик. Таъмирлаб қўйганимиздан сўнг оғир юкни кўтара олмаган қувурларга яна шикаст етиб сув оқиб чиқаверган. Биз таъмирлаш жараёнида 750—800 метр атрофидаги ушбу қувурдан ўтадиган сув таъминотини тўхтатиб, захира қувурлари орқали аҳолига сув етказиб беряпмиз», — дейди шаҳар сув оқова ташкилотининг фавқулотда вазиятлар (аварийний диспечер) бўлими бошлиғи Аброр Абдуллаев.
Маълумотларга кўра 2007 йилги давлат дастури асосида шаҳардаги кўплаб сув қувурлари қайта таъмирланганида «Хавос» номли қувурлар ўрнатилган. Афсуски ушбу сув қувурлари ўзини оқламаган. Озгина ортиқча босим бўлган ерда қувурлар яроқсиз бўлиб қолган. Мутахассиснинг фикрича, бундай турдаги қувурни улаб ҳам, ямаб ҳам бўлмас экан.
«Бизнинг ташкилот ташкил топганига эндигина бир йил бўлди. Шу боис ҳам кўп одамларнинг бу ташкилот ҳақида хабари йўқ. Бевосита ушбу ҳолат бўйича гапирадиган бўлсам, айни пайтда шаҳар сувоқова ташкилотига Абу Бакр Розий кўчасидаги ҳолат бўйича фуқаролар томонидан неча маротаба мурожаат келиб тушгани ўрганилмоқда. Боиси, шу вақтга қадар бизнинг инспекциямизга ҳеч қандай хабар келиб тушмаган. Биз вилоятимиздаги ер ости сув таъминоти билан боғлиқ ҳар қандай муаммони ўрганиб, уни бартараф этамиз», — дейди Вазирлар Маҳкамаси ҳузуридаги ичимлик сувини назорат қилиш инспекциясининг Самарқанд вилоят худудий бош инспектори Равшан Қурбонов.
Вазирлар Маҳкамаси ҳузуридаги ичимлик сувини назорат қилиш инспекциясининг Самарқанд вилоят худудий бош инспектори берган маълумотга кўра 2018 йилда Самарқанд шаҳар бўйича ичимлик сувини етказиб бериш сифатини ошириш мақсадида 50 миллион АҚШ доллари миқдорида маблағ ажратилган. Ҳозирда шаҳардаги Сартепо массивидан бошлаб ичимлик суви қувурларини алмаштириш ва таъмирлаш ишлари олиб борилмоқда. Хусусан, Абу Бакр Розий кўчасида ҳам қайта таъмирлаш ишлари олиб борилади. Йил охиригача шаҳар худудида ўрнатилган «Ховос» қувурлари қаерда ўрнатилган бўлса, барчаси олиб ташланиб ўрнига янги қувурлар ўрнатиш режалаштирилган.
Сув қувури билан боғлиқ муаммо ҳал этилди. Аммо таъмирланганига узоқ бўлмаган йўл эса яна эски ҳолатига келиб қолди. Ўйлаймизки, шаҳар йўлсозлари тез орада Абу Бакр Розий кўчасида йўл муаммосига ҳам барҳам беришади.
Изоҳ (0)