Бугун, 18 июль санасида футбол бўйича Ўзбекистон Pepsi Суперлигасининг 17-тур учрашувларига старт берилди. Кун тақвимидан одатга кўра уч учрашув ўрин олганди. Уларнинг барчаси якунига етди.
Куннинг дастлабки ўйини Қўқонда мезбон «Қўқон-1912» ҳамда Олмалиқнинг АГМК жамоалари ўртасида кечди.
Учрашувда ҳисоб 27-дақиқада очилди. АГМК футболчиси Владимир Бубанья тўпни қўли билан ўйнади деб топган Шерзод Қосимов олмалиқликлар дарвозасига пенальти белгилади. Уни қўқонликларнинг штатли пенальтичиси Мурод Холмуҳаммедов аниқ амалга оширди. 44-дақиқада Жасур Ҳакимовни олмалиқликлар йиқитди деган қарор билан Қосимов, иккинчи пенальтини ҳам белгилади. Уни ҳам Мурод ҳеч қандай қийинчиликсиз Павел Матяш дарвозасига жойлаб қўйди.
65-дақиқада биринчи бўлимда иккита пенальтидан гол ўтказган Павел Матяш Қосимов томонидан биринчи сариқ карточка билан жазоланди. Павел бунга жавобан ҳакамга эътироз билдирди ва дарҳол иккинчи сариқни ҳам ўзиники қилди. Сўнгра автоматик равишда қизилни олиб, майдондан бадарға бўлди. 72-дақиқада эса Суҳроб Бердиев «Қўқон-1912»нинг пенальтидан эмас, ўйиндан урилган голига муаллифлик қилиб, учрашувга якуний нуқтани қўйди.
17-тур доирасида мусобақа пешқадами «Пахтакор» эса «Қизлиқум» меҳмони бўлди. Учрашувнинг 76-дақиқадасида Иван Нагаев Элдор Суюнов дарвозасини ишғол қилиб, «Қизилқум»ни ҳисобда олдинга олиб чиқди. Учрашув якунига бир неча дақиқа қолган мезбонлар дарвозаси икки бор ишғол этилди. Аввалига Жасур Яхшибоев 90-дақиқада ҳисобни тенглаштирган бўлса, 90+4 дақиқада эса Тиаго Безерра «Пахтакор»нинг навбатдаги ғалабасини таъминлаган голга муаллифлик қилди.
Турнинг марказий ўйини эса Тошкентда мезбон «Локомотив» ҳамда Қаршининг «Насаф» жамоалари ўртасида бўлиб ўтди.
Учрашувда ҳисоб 6-дақиқада Марат Бикмаев томонидан очилди. Қаршиликлар бу голга 23-дақиқада Шароф Муҳитдиновнинг голи билан жавоб беришди.
Биринчи бўлимда қўшиб берилган дақиқаларда Марат Бикмаев иккинчи марта боши билан Қувватов дарвозасини ишғол қилди ва жамоасини танаффусга ғолиб сифатида олиб чиқиб кетди. Учрашувга якуний нуқтани қўйиш Марат Бикмаевга насиб этди. Марат 63-дақиқада хет-трикка эришди.
Pepsi Суперлига
17-тур беллашувлари
18 июль, чоршанба
Изоҳ (0)