2018 йил январь—июнь ойларида Ўзбекистонда ўртача ойлик иш ҳақининг энг юқори миқдори Тошкент шаҳрида қайд этилди. Бу ҳақда Давлат статистика қўмитаси маълум қилди.
Пойтахтда ўртача ойлик иш ҳақи миқдори 2 252,1 минг сўмни ташкил этди. Бу республикадаги ўртача ойлик иш ҳақига нисбатан 140 фоизга кўп.
Навоий вилоятида бу миқдор 2 153 минг сўм (133,8 фоиз), Тошкент вилоятида эса 1 768,5 минг сўмга (109,9 фоиз) тенг бўлди.
Бу кўрсаткич Наманган вилоятида 1 263,3 минг сўмни (78,5 фоиз), Самарқанд вилоятида 1 273,6 минг сўмни (79,2 фоиз) ташкил этиб, бошқа ҳудудларга нисбатан энг паст кўрсаткич қайд этилди.
Статистика қўмитасининг таҳлилига кўра, 2018 йил январь—июнь ойларида Ўзбекистонда ўртача ойлик номинал ҳисобланган иш ҳақи 1 609,1 минг сўмни ташкил этди.
Бунда иш ҳақига устама, мукофот, рағбатлантириш хусусиятига эга тўловлар, компенсация ва ишланмаган вақт учун ҳақ каби тўловлар киритилган. Шунингдек унинг таркибида жисмоний шахслар даромад солиғи, ижтимоий суғурта ва касаба уюшмасига тўловлар ҳам мавжуд.
Изоҳ (0)