Қозоғистоннинг Туркистон вилоятида Хожа Аҳмад Яссавий зиёратгоҳидан баланд бўлмаган ўрта асрлар услубига хос турар жойлар қурилиши режалаштирилмоқда. Бу ҳақда ушбу вилоят ҳокимлиги матбуот хизмати маълум қилди, дея хабар беради «Халқ сўзи».
«Туркистондаги уйлар кўп қаватли бўлмайди. Сабаби уларнинг баландлиги Хожа Аҳрор Яссавий зиёратгоҳидан ошиб кетмаслиги керак. Муқаддас қадамжо ҳар томондан кўриниб туриши керак. Хонадонлар ўрта аср меъморчилиги услубида барпо этилади. Мамлакатда жуда бўлмаса битта вилоят тарихий кўриниш касб эцин», — деди Туркистон вилояти ҳокими Жансеит Туймебаев.
Ҳудуд раҳбари бу ерда туристлар учун қулай шароитлар яратиш лозимлиги, янги аэропорт, темир йўл вокзали, автовокзал, меҳмонхона ва кафе қурилиши ҳақида маълум қилди. Ўз навбатида, вилоятда буюк авлиё ва мутафаккир меросига бағишланган музей бунёд қилинади.
«Президент топшириғи доирасида ҳар бир минтақа Туркистонда биттадан иншоот қуриб беради. Масалан, Остона ҳокими Асет Исекешов Туркистонда ‘Остона’ боғини барпо этишни таклиф қилди», — деди у.
Бундан олдин ушбу вилоят ҳокими Туркистон Самарқанд, Бухоро, Хива сингари сайёҳлик марказларидан бирига айланиши кераклигини билдирганди.
Эслатиб ўтамиз, жорий йили Қозоғистонда Чимкент республика мақомидаги шаҳарга, Туркистон эса шу номли вилоят (аввалги Жанубий Қозоғистон вилояти) марказига айлантирилди.
Изоҳ (0)