Халқ таълими вазирлигида хусусий мактаблар мутасаддилари билан учрашув бўлиб ўтди. Бу ҳақда вазирлик матбуот хизмати маълум қилди.
Тадбирда хусусий мактабларни ривожлантиришдаги муаммолар муҳокама қилинди. Хусусан, дивидендлар олиш имконияти йўқлиги, солиқ имтиёзлари мавжуд эмаслиги, ўқув корпуслари ва биноларни ижарага олиш, аттеcтат бера олмаслик каби муаммоли ҳолатларга тўхталиб ўтилди. Ўқитувчиларнинг малака ошириш институтларида малака ошириши масаласи муҳокама қилинди.
Халқ таълими вазири нодавлат таълим муассасаларини ривожлантиришда, жумладан, давлат-хусусий ҳамкорлиги кўринишида ёрдам кўрсатишга тайёрлигини билдирди. Мавжуд қувватидан ўқувчи сони кам бўлган мактабларда давлат-хусусий ҳамкорлигини йўлга қўйиб, хусусий инвесторлар томонидан мактабда мавжуд ўқувчиларга бепул таълим бериш жавобгарлигини олиши каби хорижий давлатларда мавжуд тажриба қайд этилди. Шунда хусусий инвестор бино қувватидан янада самарали фойдаланиш учун инвестиция кирита олади, мазкур микроҳудуддаги ўқувчилар, айниқса кам таъминланган оила фарзандлари аввал имкониятлари етмаган сифатли таълимни ортиқча харажатларсиз олиш имкониятига эга бўлади.
Вазир бундай ёндашув бюджет маблағларининг бир қисмини озод қилиб, уларни бошқа давлат таълим муассасалари, жумладан, чекка туманлардаги мактаблар ва мактаб филиалларини такомиллаштиришга йўналтириш имконини беришини таъкидлаб ўтди.
Йиғилишда, шунингдек, малака ошириш марказларини давлат-хусусий ҳамкорлиги кўринишида ташкил қилиш истиқболлари муҳокама қилинди. Тарафлар бугунги кунда ўқув-методик жараёнини ривожлантириш, давлат таълим стандартлари, дарсликлар ва ўқув-методик қўлланмаларни яратишдаги бўшлиқларни алоҳида қайд этди.
Учрашув якунлари бўйича Халқ таълими вазирлиги билан хусусий мактаблар вакиллари ўртасида юқорида айтиб ўтилган муаммоларни ҳал этиш ва халқ таълими тизимини тубдан такомиллаштириш бўйича тайёрланаётган қарор лойиҳаларига таклифлар киритишда яқин ҳамкорлик қилиш бўйича келишувга эришилди.
Изоҳ (0)