Pepsi Суперлига. «Пахтакор» «Бухоро»ни таслим этди, «Насаф» «Навбаҳор»ни юта олмади, «Нефтчи» эса ғалабани бой берди

Кеча, 8 июль санасида футбол бўйича Ўзбекистон Pepsi Суперлигаси баҳсларининг 16-турига старт берилди.

Кун тақвимидан учта учрашув олганди.

Улардан биринчи Тошкентда «Пахтакор» ҳамда «Бухоро» жамоалари ўртасида кечди. Тигао Безерра ва Владимир Козакнинг голлари сабаб «шерлар» навбатдаги 3 очкони қўлга киритди ва мусобақа пешқадамлигини янада мустаҳкамлаб олди.

Куннинг иккинчи ўйини Олмалиқда АГМК ҳамда Фарғонанинг «Нефтчи» жамоалари ўртасида бўлиб ўтди. Учрашувда жанговар 2:2 ҳисоби қайд этилди. Аввалига АГМК Йован Жокичнинг пенальтини аниқ амалга оширгани сабаб ҳисобни очган бўлса, «Нефтчи» иккинчи бўлим аввалида 2 та тўп киритиб ҳисобда олдинга чиқиб олди. Аммо ўйиннинг 87-дақиқасида Зафар Полвонов гол киритиб, ҳисобни 2:2 бўлишини таъминлади.

Бу натижадан сўнг АГМК 14 очко билан 10-ўринда, «Нефтчи» эса 7 очко билан ҳамон сўнгги поғонада.

Куннинг сўнгги ўйинида Қаршида «Насаф» «Навбаҳор»ни қабул қилди. 21-дақиқада Шароф Муҳиддинов мезбонларни ҳисобда олдинга олиб чиққан бўлса, 67-дақиқада Сардор Сулаймонов ҳисобни тенглаштирди. Ўйин эса томонларнинг 1:1 ҳисобидаги дуранг натижаси билан якунланди.

Дурангдан сўнг «Насаф» 19 очко билан 7-ўринда бўлса, «Навбаҳор» эса 28 очко билан 2-ўринда.