2019 йилнинг 1 январидан бошлаб Ўзбекистонга олиб кириладиган электромобилларга нисбатан 0 (нол) қийматдаги божхона тўлови жорий қилинади, деб ёзмоқда Spot.
Мазкур қоида фақатгина электр двигателли автомобилларга нисбатан амал қилади.
Янги ставкалар 2019 йил 1 январдан эътиборан кучга киради. 2018 йилги божхона ставкаларига электромобиллар коди киритилмаган.
Электромобилни божхонадан ўтказиш учун техник паспорт, олди-сотди шартномаси ва сертификат талаб қилинади. Божхона йиғими тўлови ва товар нархига қўшилган қиймат учун солиқ тўлаш мажбурий саналади.
Автомобильнинг божхона нархи олди-сотди шартномасида кўрсатилган қийматга кўра ёки нархларнинг халқаро каталогига асосан белгиланади. Товар нархига қўшилган қиймат учун солиқ ставкасини аввалига 12 фоиз миқдорида белгилашга келишилган эди, бироқ ставка 20 фоиз деб белгиланди. Ушбу солиқ автомобилнинг таннархи, божхона тўлови ва акциз солиғидан келиб чиқиб белгиланади.
Бундан ташқари, электромобиллар учун акциз солиғи тўланмайди.
Мисол учун, Tesla Model X 100D электромобилнинг таннархи — 230 минг АҚШ доллари. Уни божхонадан ўтказиш 48 000—49 000 долларга тенг бўлади. Бу — товар нархининг 21—23 фоизи деганидир.
Юқоридаги қоидалар электромобилнинг ишлаб чиқариш йили ёки нархидан қатъий назар амал қилади. Эҳтимол, фойдаланилган электромобиллар учун кейинчалик алоҳида қоидалар ишлаб чиқилиши мумкин, лекин ҳозирда ҳар қандай электромобил учун божхона тўловлари товар нархининг 21-23 фоизига тенг бўлади.
Изоҳ (0)