Деҳқонобод калий заводи Россия компаниясидан қарздор эмаслигини маълум қилди

Деҳқонобод калий заводи МЧЖ бош директори Ҳамидулла Шерматов «Зумк-Инжиниринг» МЧЖнинг касодга учрагани борасида расмий позициясини эълон қилди, деб ёзмоқда Spot.

Шерматовнинг айтишича, у бошқараётган корхона комбинат қурилиши пудратчиси бўлган Россия компанияси билан ҳисоб-китоб қилиб бўлган ва барча қарзларидан қутилган.

Аввалроқ арбитраж суди «Зумк-Инжиниринг» МЧЖнинг касодга учраганини эълон қилган. Компания вакилларининг фикрича, Деҳқонобод калий заводи вақтида қарзларини узганида «Зумк-Инжиниринг» касодга учрамаган бўлар эди.

Шерматовнинг маълум қилишича, Ўзбекистондаги фаолияти давомида «Зумк-Инжиниринг» заводдан 177 миллион доллар олган ва 40 миллион доллар миқдорида фойда кўрган.

«2016 йил сентябрда «Зумк-Инжиниринг» президенти Поздеев ўзининг молиявий маслаҳатчиси — вице президент Сухoносов билан ҳамкорликда «Зумк-Инжиниринг» МЧЖнинг касодга учраганини маълум қилган», — дейди Шерматов.

«Зумк-Инжиниринг» МЧЖ — «Зумк» (Ғарбий Урал машинасозлик концерни) таркибидаги корхоналардан бири. «Зумк-Инжиниринг» 2007 йилдан буён Ўзбекистон ва Қозоғистонда калий шахталарини қуриш ва лойиҳалаштириш билан шуғулланади. Компания Россиянинг Перм шаҳрида рўйхатдан ўтган.

2014 йил майда «Зумк» президенти Александр Поздеев Ўзбекистонда ҳибсга олинган.