Бош прокуратура давлат компаниялари раҳбарлари учун коррупцияга қарши кураш чора-тадбирлари бўйича семинар ўтказди

Бош прокуратура академиясида Олий Мажлис Сенати ва БМТ Тараққиёт дастури билан ҳамкорликда «Корпоратив секторда коррупцияга қарши курашиш чора-тадбирларини амалга ошириш» мавзусида давлат компаниялари раҳбарлари учун семинар ўтказилди. Бу ҳақда Бош прокуратура матбуот хизмати маълум қилди.

Семинар мақсади давлат компаниялари раҳбарларини коррупциянинг олдини олиш тизими бўйича жаҳон амалиёти, компанияларда коррупциянинг олдини олишнинг самарали тизимини яратиш, шунингдек, корпоратив секторда коррупцияга қарши самарали тизимни қуришнинг муҳим тамойиллари билан таништиришдан иборат бўлди.

Тадбирда «Ўзбекнефтгаз», «Ўзтрансгаз» «Ўзбекистон темир йўллари», «Ўзбектелеком», «Ўзметкомбинат», «Ўзбеккўмир», «Ўзкимёсаноат» акционерлик жамиятлари, Миллий банк, Халқ банки, Beeline, Ucell мобил алоқа операторлари, Nestle қўшма корхонаси ва бошқа йирик корхоналарнинг раҳбарлари, шунингдек, коррупцияга қарши чора-тадбирларни амалга оширишга масъул бўлган прокуратура органлари ходимлари ва академия тингловчилари иштирок этди.

Дастур доирасида KPMG халқаро аудит-консалтинг компанияси экспертлари Игорь Лебедев, Фаррух Абдуллаханов ҳамда Президент ҳузуридаги Лойиҳаларни бошқариш миллий агентлиги вакиллари маърузалар билан қатнашди.

Маърузалар давомида корпоратив секторда коррупцияга қарши тадбирларни амалга ошириш, коррупцияга қарши курашишнинг тамойиллари, коррупциянинг олдини олишнинг ҳозирги трендлари ва бошқа масалалар ҳақидаги тақдимотлар намойиш этилди.

Барча маъруза ва тақдимотлар интерфаол шаклда ўтказилиб, муҳокамалар билан давом эттирилди.