Инновацион ривожланиш ҳамда Олий ва ўрта махсус таълим вазирликлари ва Фанлар академияси 25—29 июнь кунлари Ўзбекистондаги барча илмий-тадқиқот муассасалари илмий ишлар бўйича директор ўринбосарлари ва олий таълим муассасаларининг илмий ишлар ва инновациялар бўйича проректорларини суҳбатдан ўтказди. Суҳбатдан ўтказиш комиссиясига Инновацион ривожланиш вазири Иброҳим Абдураҳмонов раислик қилди, дея «Дарё»га хабар беради вазирлик матбуот хизмати.
Таъкидлаш жоизки, эндиликда олий таълим муассасаларининг илмий ишлар ва инновациялар бўйича проректорлари ҳамда Фанлар академияси, давлат ва хўжалик бошқаруви органлари илмий-тадқиқот муассасаларининг илм-фан бўйича директор ўринбосарларини лавозимга тайинлаш Инновацион ривожланиш вазирлиги билан келишилган ҳолда амалга оширилади. Илмий ишлар ва инновациялар бўйича проректорлар ҳамда илм-фан бўйича директор ўринбосарлари инновация фаолиятига оид масалалар, илмий-инновацион ишланмаларни жорий этиш ва тижоратлаштириш натижалари бўйича бевосита Инновацион ривожланиш вазирлигига ҳисоб беради.
Суҳбатдан ўтказиш давомида илмий ишлар бўйича директор ўринбосарлари ва проректорларнинг мамлакатда амалга оширилаётган сиёсий, ижтимоий-иқтисодий ислоҳотлар мақсадлари, вазифалари ва асосий йўналишлари мазмун-моҳиятини тушуниши, шунингдек, тегишли илмий-тадқиқот йўналишларидаги илмий муаммоларни аниқлаш ҳамда уларни ҳал этиш юзасидан аниқ вазифаларни белгилай олиш кўникмаларининг шаклланганлигига баҳо берилди.
Бундан ташқари, тегишли соҳа ва корхоналарнинг илмий-техник муаммоларини ҳал этишга йўналтирилган тадқиқотларни ташкил этиш, илмий натижаларни тижоратлаштириш, ёшларни илмий ишга кенг жалб этиш бўйича фаолият натижалари даражаси ўрганилди. Муассасанинг илмий-тадқиқот, педагогик фаолияти натижалари (илмий мақолалар, дарслик, ўқув қўлланма, монография ва бошқалар сони ва сифати)нинг эълон қилиниши, хорижий ҳамкорлари билан биргаликда олиб бораётган илмий ишлари ҳолатига ҳам эътибор қаратилди.
Ўз навбатида проректорлар ва директор ўринбосарлари суҳбат жараёнида келгуси йил давомида Инновацион ривожланиш вазирлиги билан ҳамкорликда амалга оширадиган ишлари тўғрисида «Йўл харита»ларини ҳимоя қилди.
Комиссия йиғилиши баённомаси Президенти девонига тақдим этилиши назарда тутилган бўлиб, суҳбатдан ўта олмаган ходимларга қуйи лавозимда ишлаш тавсия этилиши мумкин. Бундай лавозим бўлмаса ёки суҳбатдан ўтувчи тавсия этилган лавозимда ишлашдан бош тортса, у билан тузилган меҳнат шартномаси Меҳнат кодексига мувофиқ бекор қилинади.
Изоҳ (0)