Россиялик аёл мияси операция қилинаётган вақтда флейта чалиб турди

Россиялик флейтачи Софя Пинаева ўз бошидаги ўсимтани олиб ташлаш бўйича жарроҳлик амалиёти вақтида мумтоз мусиқани чалиб турди. «РИА Новости»нинг хабар беришича, мия яримшарлари ишлаётганини текшириб туриш учун шундай қилинган.

Аёл Австриянинг Грац шаҳрида операция қилинган. Амалиёт вақтида аёлнинг ҳуши тўлиқ ўзида бўлган. Шифокорлар беморни наркоздан чиқариб, нутқ, кўриш, майда моторика ва миянинг бошқа функцияларини текширишга йўналтирилган қатор тестларни ўтказган.

Хусусан, аёл бу тестлар вақтида флейтада куй ҳам ижро этган. «Бах куйларидан, Моцартдан — хаёлимга нима келса, шуни ижро этдим», — деди у.

Жарроҳ Горд фон Кампенинг сўзларига кўра, умумий наркоз билан амалга оширилаётган операциялар вақтида шифокорлар кўпи билан қўл-оёқнинг ишламай қолганини аниқлай олади, сезгиларнинг ўрнида экани ёки эмаслигини билиб бўлмайди.

Натижада аёл глиомасининг катта қисми олиб ташланган. Австриянинг Куриэр нашри ахборотига кўра, орадан бир неча кун россиялик флейтачи аёл операсянинг муваффақиятли ўтганини ўз дўстлари билан бирга нишонлаган.