Афғонистон ҳарбий-ҳаво кучларининг авиазарбалари оқибатида «Толибон» ҳаракатининг камида 12 нафар жангариси ҳалок бўлган, яна 18 нафари тан жароҳати олган. Бу ҳақда «РИА Новости» хабар бермоқда.
Tolo News телеканали ахборотига кўра, авиазарбалар Бадгис вилоятининг Javaнд туманидаги «Толибон» марраларини йўқ қилиш бўйича операция доирасида берилган.
Аввалроқ, 30 июнь куни Афғонистон президенти Муҳаммад Ашраф Ғани «Толибон» ҳаракати билан эришилган ўзаро ўт очишни тўхтатиш тўғрисидаги сулҳнинг амал қилиши якунига етгани ва ҳукумат кучлари ўз жанговар операцияларини қайтадан бошлаганини эълон қилганди.
Эслатиб ўтамиз, Рамазон Ҳайити муносабати билан Афғонистон президенти 11—19 июнь кунлари бир томонлама сулҳ эълон қилган эди. Бунга жавобан «Толибон» ҳаракати ҳам уч кунга ўт очишни тўхтатишини маълум қилганди.
Кейинчалик Афғонистон ҳукумати сулҳни яна 10 кунга узайтириши ҳақида эълон қилди. «Толибон» эса, ўз навбатида, ушбу ташаббусни қўллаб-қувватлаш ниятида эмаслигини билдирган эди.
Қайд этиш жоиз, 30 июнга ўтар кечаси «Толибон» кучлари Тожикистон билан чегарадаги Ойхонум портини эгаллаб олгани ҳақида хабар берилган эди.
Изоҳ (0)